Наманган ва Фарғона вилоятларида фуқароларни хорижга ишга жўнатиш ва Умра зиёратига юборишни ваъда қилиб, уларнинг пулини олмоқчи бўлган шахслар аниқланди. Бу ҳақда Давлат хавфсизлик хизмати хабар бермоқда.

Маълум бўлишича, Наманган шаҳрида яшовчи 2004 йилда туғилган йигит Тўрақўрғон туманида яшовчи икки кишини танишлари орқали Хорватияга ишга юборишни ваъда қилган. Бунинг эвазига у 3 600 доллар талаб қилган. Ўтказилган тезкор тадбирда у 1 000 долларни олиб бораётган пайтида қўлга олинган.

Шунингдек, Фарғона вилоятининг Бувайда туманида 1969 йилда туғилган шахс ҳеч қандай ваколатга эга бўлмаса-да, икки фуқарони Саудия Арабистонидаги Умра зиёратига юборишни айтган. У фуқаролардан 2 200 доллар олаётган вақтида ДХХ ва ички ишлар ходимлари томонидан ушланган.

Ҳозирда ҳар икки ҳолат юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари олиб борилмоқда. Эслатиб ўтамиз, аввалроқ ҳам шунга ўхшаш ноқонуний ҳолатлар аниқлангани ҳақида хабар берилган эди.