Тошкент шаҳридаги “5-автобус саройи” филиали ҳудудида автобус ёниб кетди.

“Тошшаҳартрансхизмат” АЖ матбуот хизматининг маълум қилишича, ёнғин 13 январь куни соат тахминан 02:03 ларда 2018 йилда ишлаб чиқарилган MAN A22 CNG русумли автобусда юз берган. Автобус саройи филиалининг навбатчи нозимлари томонидан зудлик билан 101 қисқа рақамига соат 02:10 да қўнғироқ қилиниб, ёнғин ҳақидаги хабар берилган. Фавқулодда вазиятлар бошқармаси ўт ўчириш бўлинмаси соат 02:20 да филиал ҳудудига етиб келган ва ёнғин соат 02:40 да тўлиқ бартараф этилган. Мазкур автобусга бириктирилган 10 йиллик иш стажига эга ҳайдовчи ушбу автобусда 101-сонли йўналишда ҳаракатланган бўлиб, 12 январь куни соат 04:16 да навбатчи механиклар текширувидан ўтиб, автобусни техник соз ҳолатда соат 05:33 да филиал ҳудудидан олиб чиққан ҳамда йўналишда қатновларни тўлиқ бажариб соат 22:00 ларда якунлаган. Шундан сўнг ҳайдовчи “Даврон сифатли газ” МЧЖ газ қуйиш шохобчасига бориб, автобусга газ қуйдирган ва соат 23:29 да филиал ҳудудига қайтиб келиб автобусни эшикларини ёпган ҳолда сафга қўйган. Ҳодиса оқибатида жароҳатланганлар бўлмаган.

• Автобус
• Тошкент
• ёнғин