АҚШ президенти Доналд Трамп Америка ҳарбий-ҳаво кучлари Эрондаги учта энг йирик ядровий объектни бомбардимон қилганидан кейин халққа мурожаат қилди.

Унинг сўзларига кўра, Фордо, Натанз ва Исфаҳон ядровий объектлари “тўлиқ” йўқ қилинган ва бу “мислсиз ҳарбий муваффақият” натижаси бўлган.

“Эрон энди тинчликни танлаши керак. Акс ҳолда, кейинги ҳужумлар бундан ҳам каттароқ ва анча вайронкор. Яна кўплаб нишонлар бор. Агар тинчликка тез орада эришилмаса, биз уларни аниқлик, тезлик ва маҳорат билан йўқ қиламиз”, — дея огоҳлантирган Трамп.

АҚШ президенти, шунингдек, бу ҳолат давом этмаслигини айтган. “Ёки тинчлик бўлади, ёки Эрон учун, сўнгги саккиз кун ичида кўрганимиздан анча даҳшатли фожиа юз беради”, — дея таъкидлаган у.

Қўшма Штатлар президенти ўз мурожаатида Исроил бош вазири Бинямин Нетаняхуга миннатдорчилик билдириб, АҚШ ва Исроил “бир жамоа сифатида ишлаганини” айтган.

“Мен бош вазир Бинямин Нетаняхуга миннатдорчилик билдирмоқчиман. Биз бир жамоа сифатида, ҳамкорликда ишладик. Бу Исроил учун хавфни йўқ қилиш йўлида катта қадам бўлди. Исроил армиясига қилган ажойиб иши учун миннатдорчилик билдираман”, — деган Трамп.

Президентга кўра, бу ҳужумларнинг асосий мақсади Эроннинг ядро бойитиш имкониятини тугатиш ва “терроризмнинг дунёдаги энг йирик ҳомийси” томонидан келаётган ядро таҳдидини тўхтатиш бўлган.

• АҚШ
• Eron
• Havo hujumi
• Мурожаат
• Трамп
• Ядровий қуроль