АҚШ президенти Доналд Трамп зарурат туғилганда Россия ва Украина президентлари Владимир Путин ва Владимир Зеленский билан уч томонлама учрашув ўтказишга тайёр эканлигини маълум қилди. У бу ҳақда Оқ уйда журналистлар билан учрашувда маълум қилган.

Трампдан “ҳозирда Путин чиндан ҳам урушни тугатмоқчи, деб ўйлайсизми?”, деб сўрашганда у икки ҳафтадан сўнг Путин ҳақиқатан ҳам урушни тугатмоқчи ёки йўқлигини “маълум қилишини” ваъда берди.

“Буни сизларга айтолмайман, лекин тахминан икки ҳафтадан кейин хабар бераман. Тез орада у бизни бирор нарсага ундаяптими ёки йўқлигини билиб оламиз - агар шундай бўлса, биз бироз бошқача йўл тутамиз”, – деган Қўшма Штатлар раҳбари.

Трамп “бир неча кун олдин, музокаралар деб аталаётган жараён давомида одамлар ўлдирилгани” туфайли “ҳафсаласи пир бўлганини” таъкидлаган.

АҚШ президенти нима учун ҳамон Россияга қарши санкциялар жорий этмагани ҳақидаги саволга Трамп эҳтимолий тинчлик келишувига халақит бермаслик учун эканлигини айтиб, зарур бўлса Зеленский ва Путин билан учрашишини қўшимча қилган.

Трампга кўра, Оқ уй ҳозирда АҚШ ва Россия президентларининг шахсий учрашувини ташкил этиш устида ишламоқда.

“Ушбу босқичда биз президент Путин билан учрашув устида ишламоқдамиз. Ишлар қандай ривожланишини кўрамиз. Менимча, ҳаммаси яхши, аммо кўрамиз”, – деган Доналд Трамп.

• АҚШ
• Музокара
• Россия
• Трамп
• Украина