Украина Президенти Владимир Зеленский бугун, 28 май куни Германияга етиб борди. Унинг самолёти Берлинга қўнган. Бу ҳақда “Deutsche Welle” хабар бермоқда.

Германияда ҳарбий шараф билан қабул қилинган Зеленский аллақачон Германия канслери Фридрих Мерц билан учрашган.

Германия ҳукуматининг расмий вакили Стефан Корнелиуснинг маълум қилишича, Владимир Зеленскийнинг ташрифи чоғида “Германиянинг Украинани қўллаб-қувватлаши ва Россия билан урушда ўт очишни тўхтатиш ҳаракатлари” муҳокама қилинади.

Мерцнинг партияси ва мухолифат канслерни Россия босқинидан ўзини ҳимоя қилаётган Украинага ТАУРУС қанотли ракеталарини етказиб бериш бўйича қарор қабул қилишга чақирмоқда.

Германияга ташрифи олдидан Владимир Зеленский тинчлик музокаралари бўйича олий даражадаги – ҳам икки томонлама, ҳам уч томонлама, хусусан, Россия ва АҚШ Президентлари Путин ва Трамп иштирокида учрашувларга тайёр эканини айтган.

“Биз “Трамп – Путин – мен” форматига тайёрмиз, “Трамп – Путин”, “Трамп – Зеленский”, кейин эса уччаламиз форматига тайёрмиз. Айтмоқчиманки, бу тарқоқ учрашувлар эмас”, – деган Зеленский.

Украина Президентининг қўшимча қилишича, Америка ва Россия томонлари Киевнинг бундай тайёрлигидан хабардор бўлган.

.

• Германия
• Ташриф
• Украина
• Зеленский