UzTest Бухоро вилояти ҳудудий филиалида Германиядан Ўзбекистонга олиб келинган 3 дона синов лаборатория жиҳозининг бири йўқолиб қолгани ҳақида хабар берилганди. Илмий-синов ва сифат назорати маркази ҳолат юзасидан маълумот берди.

Маълум қилинишича, ҳақиқатан ҳам UzTest Бухоро ҳудудий филиалида қиймати 150 миллион сўмлик “Тормозной стенд” синов ускунаси ҳамда 250 миллион сўмлик газбаллонларни ўлчаш воситалари ўғирланган. Ушбу ҳолат Ўзбекистон техник жиҳатдан тартибга солиш агентлиги Комплаенс назорат бўлими томонидан ўтказилган ўрганишлар давомида аниқланган.

Бу ҳақда ҳужжатлар 2024 йил ноябрь ойида Бухоро вилояти ҳуқуқни муҳофаза қилиш идораларига юборилиб, аниқланган ҳолат юзасидан суриштирув ишлари олиб борилаётгани маълум қилинди.

Шунингдек, Ўзбекистон илмий-синов ва сифат назорати марказида (UzTest) 6 млрд сўм маблағни мақсадсиз сарфлаб юборилгани иддао қилинган хабарлар инкор қилинди. Агентлик Комплаенс назорати бўлими томонидан тизим ташкилотлари, шу жумладан, Марказнинг молиявий фаолияти устидан доимий мониторинг ўрнатилгани қайд этилди.

ЎзА ушбу ҳолат юзасидан изоҳ сўраб, “Ўзбекистон илмий синов ва сифат назорати маркази” ДМ масъулларга сўров юборган.

• Бухоро
• хабар