Археологлар Миср мамлакатидаги “Хэопс“ пирамидасининг асосий кириш эшиги ёнида узунлиги 9 метр бўлган яширин йўлак мавжудлигини аниқлашди. “Nature” журналида чоп этилган мақолада бу катта янги кашфиётларга олиб келиши мумкинлиги маълум қилинган.

Миср антиқа буюмлар хизмати раҳбари Мустафо Вазирийнинг сўзларига кўра, йўлак Гиза шаҳридаги ёдгорликларни сканерлаш натижасида аниқланган. Кириш жойи пирамиданинг шимолий томонида, ер сатҳидан тахминан 20 метр баландликда жойлашган ва тош плиталар орқасида “яширинган”.

Қайд этилишича, унинг нима мақсадда яратилгани ҳақида изланишлар олиб бориш керак, аммо ушбу йўлак структура ичидаги вазнни қайта тақсимлаш учун яратилган, деган тахминлар мавжуд.

“Биз ушбу коридор остида ёки охирида нимани топишимиз мумкинлигини кўриш учун сканерлашни давом эттирамиз”, – дейди Миср антиқа буюмлар хизмати раҳбари Мостафа Вазири.

2015 йилдан бери олимлар “Хэопс” пирамидасини инвазив бўлмаган технологиялар, жумладан, инфрақизил термография ва 3D моделлаштиришдан фойдаланган ҳолда тадқиқ қилмоқда. Шундай қилиб, илм-фан фидойилари дунёнинг етти мўъжизаларидан ягона омон қолган тарихий обидани текширишга муваффақ бўлишади.

“Хэопс” пирамидаси (“Буюк Гиза” пирамидаси) тахминан 4500 йил олдин фиръавн Хуфу (шунингдек, “Хэопс” деб аталади) даврида монументал қабр сифатида қурилган. Унинг баландлиги 139 метрни ташкил қилади. 1889 йилда Парижда “Эйфел” минораси пайдо бўлгунга қадар ушбу обида инсон томонидан яратилган энг баланд иншоот эди.

Ушбу кашфиётдан аввал 2017 йилда пирамида кенг кўламли ўрганилган эди. Кейин “Scan Pyramids” “Буюк Гиза” пирамидаси ичида камида 30 метр узунликдаги бўшлиқ топилгани маълум қилинган.

• Misr
• Пирамида