“Xiaomi” ўзининг янги тозалаш гаджетини тақдим этди – “Mijia Wireless Floor Sweeping Machine 2 Lite”. Бу вертикал ақлли электр пол ювгич бўлиб, у учта режимда ишлайди: қуруқ тозалаш, намлик ва қуритиш.

Электрон “швабра”да ифлосланиш даражасини баҳолаш ва қувватни мос равишда созлаш учун компьютер кўринишидан фойдаланадиган “таъсирчан сенсори” мавжуд. Ушбу пол ювгичнинг тавсияномасида соя соуси, кетчуп, сут ва уч кунлик қаҳва изларини олиб ташлаши мумкинлиги айтилади.

Айланадиган чўтка учун ўз-ўзини тозалаш тизими ҳам жорий қилинган. Фойдаланувчилар қурилмани зарядлаш станциясига улаганида у автоматик равишда ишга тушади. Икки дақиқада чўтка инсон аралашувисиз тозаланади ва қуритилади.

4000 мА/соат қувватга эга батарея ёрдамида у 40 дақиқа тинимсиз ишлай олади – ишлаб чиқарувчига кўра, бу бутун уйни тозалаш учун етарли. Тоза сув учун гажет ичидаги идишнинг ҳажми 780 мл, ишлатилган сувни йиғиш учун эса – 550 мл.

“Mijia Wireless Floor Sweeping Machine 2 Lite” 1999 юанга (тахминан 3 300 000 сўм) баҳоланган. Жорий йилнинг 15 март куни қурилма “Xiaomi Youpin” краудфандингида (ўз пулларини ихтиёрий равишда бирлаштирган инсонлар жамоаси) 1749 юанлик (2,9 млн сўм) арзонлаштирилган нархда пайдо бўлади, акция 22 март куни тугайди. Тез кунларда янгилик очиқ сотувга чиқиши кутилмоқда.

Қайд этиш мумкин, “Xiaomi” корпорацияси 2010 йил 6 апрель куни хитойлик тадбиркор Лей Жун томонидан асос солинган. 2021 йилга келиб компания жаҳон бозорида смартфон ишлаб чиқариш бўйича етакчига айланди. Бундан ташқари, маиший техника, планшетлар, ақлли соатлар, дастурий таъминот, электр скутерлар, электрон велосипедлар ва бошқа кўплаб қурилмаларни ишлаб чиқаради.

2010 йил 16 августда “Xiaomi” Андроид тизимига асосланган ва “Samsung TouchWiz” ва “Apple iOS” услубларини бирлаштирган MIUI прошивкасини расман ишга туширди.

Биринчи смартфон – “Mi 1” 2011 йил август ойида эълон қилинган. У иккита версияда пайдо бўлган. 2012 йил август ойида эса компания “Mi 2” смартфонини тақдим этди, 2013 йилнинг сентябрига келиб эса компания 10 миллиондан ортиқ қурилма сотишга муваффақ бўлди.

• Xiaomi