Ҳисоб палатаси бюджет маблағлари сарфланиши юзасидан маълумотларни расмий веб-сайтларга жойлаштириб боришга оид ҳисоботини тақдим қилди.

Таҳлилларга кўра, вазирлик ва идоралар томонидан тегишли тартибга риоя қилиш аҳволи қониқарли даражада эмас. Хусусан, танлов асосида ўрганилган 133 та ташкилотлар томонидан расмий веб-сайтларига бюджет жараёнининг очиқлигини таъминлайдиган маълумотларнинг 2022 йил 10 февраль ҳолати бўйича жойлаштирилиши таҳлил қилинганда, қуйидагилар аниқланган: 

– 66 та вазирлик ва идорада тегишли маълумотлар тўлиқ равишда жойлаштирилган; 

– 13 та вазирлик ва идорада тегишли маълумотлар қисман тақдим қилинган;

– 54 та вазирлик ва идорада эса тегишли маълумотлар умуман жойлаштирилмаган.

Шунингдек, Президент Фармони  билан белгилаб қўйилган давлат органлари ва ташкилотларининг жами 13 та тоифадаги ахборотларни ўз расмий веб-сайтида ҳар чоракда эълон қилиш ва даврий янгилаб бориш тўғрисидаги тартибига ҳам амал қилмай келаётган айрим давлат органлари ва ташкилотлари борлиги айтиб ўтилди.

Жумладан, 2021 йил 4-чорагида уларнинг 80 таси ушбу маълумотларни ўз вақтида белгиланган ресурсларда жойлаштирмаган. 

88 та давлат идораси хизмат сафарлари ва хориждан ташриф буюрган меҳмонларни кутиб олиш билан боғлиқ харажатлар бўйича ҳисоботларни ўз вақтида очиқ тақдим қилмаган.

Шу билан бирга, ўтган 2021 йилда фуқароларни бюджет жараёнида ҳудудларда жамоатчилик фикри асосида шаклланган тадбирлар натижасида айрим ҳудудларда умуман овоз тўпламаган ҳамда “Очиқ бюджет” ахборот порталида “ғолиб” деб топилмаган таклифларни молиялаштириш ҳолатлари аниқланган. 

Мисол учун, Жиззах вилояти Зарбдор туманида 4 та, Хоразм вилояти Урганч шаҳрида 5 та таклиф ўрнатилган талабларга зид равишда молиялаштирилган. Жамоатчилик эшитуви давомида бюджет очиқлигини таъминламаган тегишли давлат органлари ва ташкилотлари масъулларининг ахбороти ҳам эшитилди.

Мутасаддиларга бюджет жараёнининг очиқлигини таъминлаш устидан назорат Ҳисоб палатасига юклатилгани ҳамда бюджет жараёнининг очиқлигини таъминлаш тартибини бузганлик учун мансабдор шахсларга маъмурий жавобгарлик белгилангани эслатиб ўтилди.

• Давлат бюджети
• Ҳисоб палатаси
• Ҳисобот