IMAN Holding “Iman Invest” компаниясининг 70 млн долларлик портфелида 20 млн доллар камомад борлиги ҳақидаги даъволарга муносабат билдирди. Компания ушбу талқинга қўшилмаслигини, унда келтирилган кўрсаткичлар турли молиявий ҳолатларни бирлаштириши ва уларни бевосита зарар сифатида баҳолаш нотўғри эканини маълум қилди.

Аввалроқ Ислом молиясини мувофиқлаштириш кенгаши вакили Маҳмуд Усмон компаниядаги молиявий тафовутлар ва инвесторлар маблағлари билан боғлиқ масалаларни очиқлаган эди. IMAN Holding эса эътирозларга жавобан бир нечта молиявий кўрсаткич бўйича изоҳ берди.

Компания маълумотига кўра, муаммоли қарзлар бўйича захиралар билан қопланмаган риск 3,5 млн долларни ташкил этади. 1-октабр ҳолатида бундай қарзларнинг портфелдаги улуши 6,5 фоиз бўлган, 31,91 млрд сўмлик захиралар ҳисобга олинганда эса бу кўрсаткич 3,5 фоизга тушган.

Яна бир масала — бошқарув компаниясининг инвестиция фонди олдидаги 2,97 млн долларлик қарзи. IMAN Holding ушбу маблағ бошқарув ташкилотининг жорий харажатларини фонд ҳисобидан молиялаштириш натижасида юзага келганини билдирди. Компания бу амалиёт июль ойида тўхтатилганини ва маблағларни ноябрдан бошлаб олти ой ичида қайтариш режалаштирилганини маълум қилди.

Шунингдек, компания 140,75 млрд сўмлик ортиқча капитал ҳақидаги эътирозга ҳам жавоб берди. IMAN маълумотига кўра, 2026 йил 1-октабр ҳолатида насия савдо портфели 1 трлн 105 млрд 777 млн сўмни, инвесторлар портфели эса 965,02 млрд сўмни ташкил этган. Компания ушбу кўрсаткичларни молиявий тафовут мавжуд эмаслигининг далили сифатида келтирган.

Компания асосчиси Рустам Раҳматов учун 2026 йил апрель ойида тахминан 128 минг долларга харид қилинган Mercedes-Benz C500 автомобили масаласи ҳам изоҳланди. IMAN Holding автомобиль фонд фойдасига ижарага бериш мақсадида олинганини, бироқ кейинчалик битим исломий молиялаштириш тамойилларига мос келмаслиги тан олинганини билдирди. Компания маълумотига кўра, автомобиль 12 август куни сотилган, унинг қиймати ва ижара тўловлари тўлиқ қайтарилган.

Бундан ташқари, 2023 йилда бўлиб тўлаш шарти билан харид қилинган BYD Champion автомобили бўйича қарздорлик 31 июль куни муддатидан олдин тўлиқ қопланган. Тўланган сумма 366,9 млн сўмдан ошган.

Юзага келган вазият муносабати билан компания бошқарувини ислоҳ қилиш режалари ҳам эълон қилинди. Унга кўра, кундалик бошқарувни янги мутахассисларга топшириш ва Рустам Раҳматовни кузатув кенгашига ўтказиш кўзда тутилган. Шунингдек, уч нафар олимдан иборат Шариат кенгашини тузиш ва молиявий шаффофликни ошириш учун мустақил аудиторларни жалб этиш режалаштирилган.

Аввалроқ, 25-октабр куни Ислом молиясини мувофиқлаштириш кенгаши “Iman Invest” билан ҳамкорликни тўхтатганини эълон қилган эди. Кенгаш дастлабки хулосаларида инвесторлар маблағларидан фойдаланиш билан боғлиқ қоидабузарликлар ва бир неча миллион долларлик камомад ҳақида маълум қилган.

Ҳозирча томонлар билдирган фикрларни тасдиқловчи мустақил хулоса мавжуд эмас. IMAN Holding баёнотида компания раҳбариятини янгилаш режалари билдирилган бўлса-да, раҳбарнинг лавозимдан кетиши ва янги раҳбар тайинланиши расман тасдиқлангани ҳақида маълумот келтирилмаган.