Тошкент вилоятида қурилиши режалаштирилган Янги Тошкент халқаро аэропорти ҳудудида жойлашган 7 та қабристон кўчирилади. Бу ҳақда вилоят ҳокимининг 15-сентябрдаги қарорида белгиланган.

Қарорга кўра, аэропорт қурилиши ҳудудида жойлашган ва фаолияти тўхтатилган қуйидаги қабристонлар кўчирилади.

Қуйи Чирчиқ туманида:

“Сергели” МФЙдаги “Сергели болалар” қабристони;

“Сергели” МФЙдаги “Корейс” қабристони.

Ўрта Чирчиқ туманида:

“Янгийўл” МФЙдаги “Сувон бағиш” мусулмон қабристони;

“Янгийўл” МФЙдаги “Қудойқул” мусулмон қабристони;

“Янгийўл” МФЙдаги “Қудойқул” корейс қабристони;

“Янгийўл” МФЙдаги “Сариктепа” корейс қабристони;

“Янгийўл” МФЙдаги “Борис” рус христиан қабристони.

Ҳужжатда қайд этилишича, Ўзбекистон мусулмонлари идорасининг хулосасига кўра, айрим қабрлардаги марҳумлар жасадлари тупроққа айланган бўлиши мумкин. Бундай ҳолатларда ҳудуддан белгиланган тартибда фойдаланишга рухсат этилади.

Қабристонларни кўчириш жараёнида қабрлар очилганда суяк қолдиқлари аниқланса, улар эҳтиёткорлик ва ҳурмат билан йиғилиб, бошқа қабристонларга қайта дафн этилади. Барча ишлар санитария-эпидемиология, экология, архитектура, диний ва жамоатчилик талабларига риоя қилган ҳолда амалга оширилиши белгиланган.

Кўчириладиган қабристонлар ўрнига қуйидаги қабристонлардан фойдаланилади:

Қуйи Чирчиқ туманида:

“Сергели” МФЙдаги “Шардара” қабристони;

“Сергели” МФЙдаги рус-корейс қабристони.

Ўрта Чирчиқ туманида:

“Тараққиёт” МФЙдаги корейс қабристони;

“Янгийўл” МФЙдаги “Зайнаб она” қабристони.

Санитария-эпидемиология осойишталик ва жамоат саломатлиги бошқармаси эксгуматсия ҳамда қайта дафн қилиш ишлари санитария қоидаларига мувофиқ бажарилиши устидан назорат олиб боради.