Президент Шавкат Мирзиёев Паркент туманида қурилиш материаллари саноати ва туризмни ривожлантириш масалалари юзасидан инвесторлар ҳамда тадбиркорлар билан учрашув ўтказмоқда. Унда Кумушкон ҳудудида 47 гектар майдонда барпо этилган “Олтин бел” туристик мажмуаси фаолияти ва бошқа ҳудудларда туризм масканларини ташкил этиш режалари муҳокама қилинди.
Давлат раҳбари бир йил аввал Кумушконда Бўстонлиқ ва Зомин туристик зоналаридан қолишмайдиган йирик мажмуа қуриш вазифаси қўйилганини эслатди. Маҳаллий лойиҳачилар ва қурувчилар томонидан бунёд этилган мажмуада тўртта меҳмонхона, иккита ресторан, 51 та шале, аквапарк, амфитеатр ва кўнгилочар иншоотлар ташкил қилинган.
Мажмуа бир вақтнинг ўзида 6 минг нафаргача ташриф буюрувчига хизмат кўрсатиш имкониятига эга. Лойиҳа доирасида 600 та янги иш ўрни яратиш кўзда тутилган.
Шунингдек, Халқаро туризм академияси томонидан мажмуада ташкил этилган ўқув курсларида 300 нафар мутахассис тайёрланган. Қурилиш ва жиҳозлаш ишларида маҳсулотларнинг 95 фоизи маҳаллий корхоналардан харид қилингани лойиҳа таннархини 20 фоизга камайтирган.
Ушбу тажриба асосида Нанай, Хонобод, Чимёнсой, Музбулоқ, Ургут, Элликқалъа ва бошқа ҳудудларда ҳам янги туризм масканларини барпо этиш таклифлари илгари сурилди.
Президент қурилиш индустрияси ва туризм соҳаларини ўзаро боғлиқ ҳолда ривожлантириш, улар ўртасидаги ҳамкорлик орқали янги имкониятлар яратиш зарурлигини таъкидлади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!