Албания Республикаси Президентининг Ўзбекистонга расмий ташрифи доирасида Кўксарой қароргоҳида Ўзбекистон Республикаси Биринчи хоними Зироат Мирзиёева ҳамда Албания Республикаси Биринчи хоними Арманда Бегай ўртасида учрашув бўлиб ўтди. 

Очиқ ва самимий руҳда ўтган мулоқот давомида томонлар Ўзбекистон ва Албания халқлари ўртасидаги дўстлик ришталарини мустаҳкамлаш, ўзаро англашувни ривожлантириш ҳамда маданий-гуманитар ҳамкорликни кенгайтириш истиқболларини муҳокама қилди.Маданий дастур доирасида Арманда Бегай ўзбек амалий санъати намуналари, жумладан, ёғоч ўймакорлиги, қадимий сўзана каштачилиги ва анъанавий кулолчилик буюмлари билан яқиндан танишди.

Ташрифнинг ёрқин лаҳзаларидан бири ўзбек миллий либослари намойиши ҳамда мамлакатимизнинг турли ҳудудларига хос урф-одатларни акс эттирган “Келин салом” маросими тақдимоти бўлди. Олий мартабали меҳмон ўзбек халқининг бой маданий мероси, миллий қадриятлари асрлар давомида шаклланган анъаналарига юксак баҳо бериб, уларнинг ўзига хослиги ва тарихий аҳамиятини алоҳида эътироф этди.