Андижон вилоятида давлат захирасидаги ер майдонини сотишни ваъда қилган шахс фирибгарликда қўлга олинди.Бош прокуратура ҳузуридаги Департаментнинг Андижон вилояти бошқармаси ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбирда фуқаро З.Й. фуқаро Н.Т.нинг ишончига киргани аниқланди.У ўзини гўёки Андижон вилояти Статистика бошқармаси ходими сифатида таништириб, Андижон тумани “Йўлдош Охунбобоев” массивида жойлашган давлат захирасидаги 40 сотих ер майдони фарзанди М.Й. томонидан аукционда ютиб олингани ҳақида ёлғон маълумот берган. 

Шунингдек, 160 минг АҚШ доллари эвазига мазкур ер ҳужжатларини келгусида харидор номига расмийлаштириб беришни ваъда қилган.Тезкор тадбир давомида у келишилган пулнинг 80 минг АҚШ долларини олган вақтида ашёвий далиллар билан ушланди.Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.