Hindistonning Madxya-Pradesh shtatida Satish Xatik va Sajid Muhammad ismli ikki do‘st  ijaraga olingan yer uchastkasidan 15,34 karatli olmos topdi. BBC xabariga ko‘ra topilma shahar rasmiy olmos baholovchisi tomonidan tekshirilib, yuqori sifatli qimmatbaho tosh ekani tasdiqlangan.

“Toshning taxminiy bozor narxi besh–olti million rupiy (55–66 ming dollar) atrofida bo‘lib, u tez orada kimoshdi savdosiga qo‘yiladi”, – dedi olmos baholovchisi Anupam Singx.

 “Biz yer sotib olish, biznesimizni kengaytirish yoki kattaroq shaharga ko‘chib o‘tish haqida o‘ylamayapmiz. Hozircha opa-singillarimizni turmushga berishga e’tibor qaratganmiz”, – deydi ikki do‘st.

Ma’lumotlarga ko‘ra, 24 yoshli Satish Xatik go‘sht do‘konini boshqaradi, 23 yoshli Sajid Muhammad esa meva savdosi bilan shug‘ullanadi. Ular kambag‘al oilalardan bo‘lib, oilalaridagi kenja farzandlar hisoblanadi va bolalikdan do‘st.

Panna tumani aholisi orasida olmos izlash avloddan avlodga o‘tib kelayotgan mashg‘ulot hisoblanadi. Madhya-Pradesh shtatida joylashgan bu hudud Hindistonning eng kam rivojlangan tumanlaridan biri sanaladi. Mintaqada qashshoqlik, suv tanqisligi va ishsizlik muammolari mavjud.

• Hindiston
• topilma