Nyu York tarixida saylangan ilk musulmon mer Zohran Mamdani lavozimiga kirishish oldidan Qur’on bilan qasamyod qiladi. Bu haqda Associated Press xabar berdi.

Mamdanidan oldingi merlarning aksariyati Injil bilan qasamyod qilgan. AQSh federal qonunlari, shtat va shahar konstitutsiyalariga sodiqlik qasamyodi uchun diniy kitobdan foydalanish majburiy emas. Saylov kampaniyasi davomida Mamdani asosan yashash xarajatlari yuqoriligi masalasiga e’tibor qaratgan bo‘lsa-da, u o‘zining musulmon e’tiqodini ham ochiq namoyon etib kelgan. Jumladan, u beshta tumandagi masjidlarga tez-tez tashrif buyurib, ilk bor ovoz berayotgan janubiy osiyolik va musulmon saylovchilarni ham o‘z atrofida birlashtira olgan.

Metro bekatida bo‘lib o‘tadigan qasamyod marosimida Mamdani qo‘lini ikkita Qur’on ustiga qo‘yadi: biri bobosiga tegishli Qur’on, ikkinchisi esa XVIII asr oxiri yoki XIX asr boshlariga oid, cho‘ntak hajmidagi Qur’on bo‘ladi. U Nyu York jamoat kutubxonasining Shomburg qora tanlilar madaniyatini o‘rganish markazidagi to‘plamning bir qismi hisoblanadi.

“Qur’onning ushbu nusxasi shahar musulmonlarining xilma-xilligi va qamrovini anglatadi. Bu Qur’onning hajmi kichik, ammo u Nyu York tarixidagi e’tiqod va o‘ziga xoslik elementlarini birlashtirib turadi”, – deydi kutubxona xodimi Hiba Abid.

2026-yilning birinchi kuni City Hall binosida bo‘lib o‘tadigan keyingi rasmiy marosimda esa Mamdani bobosi va buvisiga tegishli Qur’onlardan foydalanadi. 

• AQSh
• Nyu-York
• Qasamyod
• Qur’oni Karim