O‘zbekiston Prezidenti Shavkat Mirziyoyev Xalqaro shaxmat federatsiyasining Nomzodlar turniri g‘olibi Javokhir Sindarov bilan telefon orqali muloqot qildi.

Davlat rahbari yosh grossmeysterni mamlakat shaxmat tarixida ilk bor ushbu nufuzli musobaqada g‘oliblikni qo‘lga kiritgani bilan samimiy tabriklab, bu natijani tarixiy yutuq sifatida baholadi.

Suhbat davomida Sindorov turnirda yuqori natijalar qayd etgani, 14 ta partiyada 6 ta g‘alabaga erishgani alohida ta’kidlandi. Prezident uning dunyoning eng kuchli shaxmatchilariga qarshi o‘yinlarda jasorat, yuksak mahorat va kuchli iroda namoyon etganini qayd etdi.

Shuningdek, davlat rahbari yosh sportchi oldida endi jahon chempionligi uchun hal qiluvchi bahslar turganini ta’kidlab, unga kelgusi o‘yinlarda omad va yangi zafarlar tiladi.

Suhbatda joriy yilda Samarqand shahrida o‘tkaziladigan 46-Butunjahon shaxmat olimpiadasida Sindorovning ishtiroki milliy jamoaga katta ruh bag‘ishlashi qayd etildi.

Fursatdan foydalanib, Prezident sportchining ota-onasi, ustoz va murabbiylarini ham ushbu tarixiy g‘alaba bilan tabrikladi. Sindorov esa bildirilgan e’tibor va ishonch uchun minnatdorlik izhor etdi.