Maktabgacha va maktab ta’limi vazirligining joriy yil 14-apreldagi ko‘rsatma xatiga muvofiq, 9- va 11-sinf o‘quvchilari uchun yakuniy davlat attestatsiyasi imtihonlari o‘tkazilish sanalari hamda fanlar ro‘yxati tasdiqlandi.

Unga ko‘ra, 9-sinf o‘quvchilari ona tili va adabiyot (yoki davlat tili) fanidan 1-iyun kuni, matematika fanidan 4-iyun kuni, O‘zbekiston tarixi fanidan esa 8-iyun kuni imtihon topshiradi. Jismoniy tarbiya fanidan sinovlar 1–6-may kunlari amaliy shaklda o‘tkaziladi.

11-sinf o‘quvchilari uchun esa ona tili va adabiyot (yoki davlat tili) fanidan imtihon 2-iyun kuni, matematika fanidan 5-iyun kuni hamda O‘zbekiston tarixi fanidan 9-iyun kuni bo‘lib o‘tadi.

Shuningdek, 11-sinf bitiruvchilari uchun tanlov fanlari ham majburiy hisoblanadi. Ular ona tili va adabiyoti (qoraqalpoq, rus, qozoq, qirg‘iz, tojik, turkman tillari), fizika, kimyo, biologiya, geografiya, davlat huquq asoslari hamda chet tili fanlaridan imtihon topshiradi. Mazkur imtihonlar 12-iyun va 15-iyun kunlari o‘tkaziladi.