18-aprel kuni Saudiya Arabistonidan Turkiya orqali O‘zbekistonga qaytayotgan 82 nafar fuqaromiz Istanbuldagi Sabiha Gökçen xalqaro aeroportida murakkab holatga tushib qolgani ma’lum bo‘ldi.

Dastlabki ma’lumotlarga ko‘ra, ziyoratchilar “Ihlos Travel” va “Hikmat Travel” turistik firmalari orqali “Er-Riyod — Istanbul — Chimkent — Toshkent” yo‘nalishida safar qilishni rejalashtirgan. Biroq, xizmat ko‘rsatuvchi tomonlar o‘z majburiyatlarini to‘liq bajarmagani sababli yo‘lovchilar xorijda noqulay vaziyatda qolib ketgan.

Vaziyat yuzasidan tegishli idoralar tomonidan tezkor choralar ko‘rildi. 

Natijada fuqarolarning tranzit hududida bo‘lishi davomida ularga oziq-ovqat, transport va boshqa zarur xizmatlar taqdim etildi. Shuningdek, ularni belgilangan yo‘nalish bo‘yicha xavfsiz tarzda O‘zbekistonga qaytarish ishlari nazoratga olindi.

Rasmiylar fuqarolar va turistik firmalarni kelgusida bunday holatlarga yo‘l qo‘ymaslik uchun safar hujjatlarini oldindan to‘liq rasmiylashtirish, tranzit yo‘nalishlar haqida aniq ma’lumot berish hamda yo‘lovchilar bilan doimiy aloqada bo‘lishga chaqirdi.