Xabar berib borayotganimizdek, 2026-yil 20–21-aprel kunlari Samarqand shahrida xalqaro miqyosdagi muhim tadbir - “Jamoat salomatligi va xavfsizligini ta’minlash maqsadida transmilliy narkotahdidlarga qarshi kurashish” mavzusida global forum bo‘lib o‘tadi.

Forum doirasida narkotiklar noqonuniy muomalasiga qarshi kurashish yo‘nalishida ilg‘or yondashuvlar va innovatsion yechimlarga bag‘ishlangan ko‘rgazma ham o‘tkaziladi.


Narkotiklar va o‘qotar qurollarni nazorat qilish agentligi hamda BMT Narkotiklar va jinoyatchilik bo‘yicha boshqarmasi bilan hamkorlikda tashkil etilayotgan mazkur nufuzli anjumanda xalqaro bojxona jamoatchiligining ham qizg‘in ishtiroki kutilmoqda.


Jumladan hozirga qadar forumda ishtirok etish uchun Jahon bojxona tashkilotining Yevropa bo‘yicha mintaqaviy direktori Antonio Lo Parko va tashkilot xalqaro eksperti Xaji Xajiyev, shuningdek, Ozarbayjon, Tojikiston, Turkmaniston bojxona xizmatlari rahbariyati hamda Pokiston, Rossiya va Qirg‘iziston bojxona idoralari vakillari yurtimizga yetib kelishdi.

• Forum
• Samarqand