31°
Kechasi 18°
Qishloq xo‘jaligi vazirligi hamda Fermerlar kengashi fermerlar, dehqon xo‘jaliklari rahbarlari va chorvadorlarga murojaat bilan chiqib, 18-apreldan 18-maygacha O‘zbekistonda “Chorvachilikda sanitariya-epidemiya-gigiyena” oyligi e’lon qilinganini bildirdi. Murojaatda qayd etilishicha, bugungi kunda dunyoda ekologik muvozanat va iqlim o‘zgarishi natijasida chorva hayvonlari orasida turli yangi kasalliklar yuzaga kelmoqda. Xususan, xorijiy davlatlarda chorva mollari o‘rtasida oqsil (yashur) kasalligi tarqalish xavfi kengaymoqda. Jahon hayvonlar sog‘ligi tashkiloti ma’lumotiga ko‘ra, 2025–2026-yillarda 48 ta davlatda ushbu kasallikning yangi “SAT” tiplari qayd etilgan bo‘lib, amalda qo‘llanilayotgan vaksinalar bu tiplarga qarshi to‘liq himoya qilmaydi. Shu sababli kasallik tarqalishining oldini olishda barcha fermer va chorvadorlarning mas’uliyati va faol ishtiroki nihoyatda muhim hisoblanadi. Shu munosabat bilan, xo‘jalik va fermalarda veterinariya-sanitariya tartiblariga qat’iy rioya qilish, kirish joylarida dezinfeksiya vositalarini tashkil etish, begona shaxslar va transport vositalarining kirishini cheklash, hayvonlarni saqlashda zoogigiyenik talablarga amal qilish, ularni sifatli ozuqa va toza suv bilan ta’minlash, hududni doimiy tozalikda saqlash hamda zararli jonivorlarga qarshi kurashish zarurligi bildirildi.
Mutasaddilar hayvonlarda yuqori harorat, og‘iz bo‘shlig‘ida va tuyoqlarda yaralar, yelinda shikastlanishlar kuzatilganda zudlik bilan veterinariya shifokoriga murojaat qilishi zarurligi ta’kidlandi. Bunday holatlarda binolarni dezinfeksiya qilish, hayvon mahsulotlarini hududdan tashqariga chiqarmaslik va sutni qaynatmasdan iste’mol qilmaslik lozim.
Qishloq xo‘jaligi vazirligi hamda Fermerlar kengashi chorva salomatligini saqlashda tozalik va veterinariya qoidalariga amal qilish eng muhim omil ekanini bildirib, fermerlar va chorvadorlardan mazkur oylik doirasida barcha profilaktik va epizootik tadbirlarni uyushqoqlik bilan amalga oshirishga chaqirdi. Kasallik alomatlari kuzatilganda (71-202-12-00, ichki: 210, 218, 323) raqamlari orqali mutaxassislarga murojaat qilish mumkin.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
