Maldiv orollarida asal oyini o‘tkazish uchun borgan ispaniyalik sayyoh akula hujumiga uchradi. Bu haqda “Daily Mail” xabar berdi.

Ma’lumotlarga ko‘ra, 31 yoshli Borha suvda bo‘lgan paytda unga akula hujum qilgan. Oqibatda uning oyog‘i tizzadan past qismi uzilib ketgan.

Sayyoh zudlik bilan shifoxonaga yetkazilgan, shifokorlar uning jarohatlangan oyog‘ini kesib tashlashga majbur bo‘lgan. Hozirda uning ahvoli og‘ir ekani aytilmoqda.

U rafiqasi bilan to‘ydan so‘ng asal oyini o‘tkazish uchun Maldivga kelgan bo‘lib, hodisa turistik ekskursiya vaqtida sodir bo‘lgan. Ma’lum qilinishicha, guruhga okeanda suzish taklif qilingan va shu paytda hujum yuz bergan.

Sayyohning rafiqasi turistik kompaniyani sudga bergani ham aytilmoqda. Uning fikricha, xavfsizlik choralariga yetarlicha e’tibor berilmagan.

Voqea sodir bo‘lgan hudud baliqni qayta ishlash zavodi yaqinida joylashgani va bu joyda akulalar ko‘p uchrashi mumkinligi qayd etilgan.