Rossiyada Telegram messenjerining ishlashida blokirovkaga xos belgilar kuchaygani qayd etilmoqda. OONI xalqaro tadqiqot loyihasi ma’lumotiga ko‘ra, 10-aprel kuni ertalab blokirovka anomaliyalari darajasi 95 foizga yetgan.

Bu ko‘rsatkich so‘nggi cheklovlar boshlanganidan beri eng yuqori daraja bo‘lib, Telegram boshqa messenjerlarga nisbatan ko‘proq cheklovlarga uchrayotgani aytilmoqda. Signal va WhatsApp’da esa bu ko‘rsatkich 89 foiz atrofida bo‘lgan.

10-aprel tongida foydalanuvchilardan Telegram ishlamayotgani, xabarlar yuborilmasligi va ilova yuklanmayotgani haqida ko‘plab shikoyatlar kelib tushgan.

Rossiya rasmiy idoralari ushbu holat yuzasidan hozircha izoh bermagan.

Avvalroq Rossiyada Telegram tezligini sekinlashtirish va ayrim funksiyalarni cheklash choralari boshlangan, aprel oyidan esa to‘liq bloklash ehtimoli haqida ham xabarlar tarqalgan edi.

• Telegram