Kecha, 1-noyabr kuni Andijon viloyatida maktab direktori bolalarni ayovsiz kaltaklagani haqida xabar qilingandi. Mazkur holat yuzasidan Maktabgacha va maktab ta’limi boshqarmasi munosabat bildirdi.

Unga ko‘ra, joriy yilning 1-noyabr kuni ijtimoiy tarmoqlarda “Oltinko‘l tumani 38-umumta’lim maktabidagi holat” sarlavhasi ostida tarqalgan xabarlar yuzasidan Andijon viloyati Maktabgacha va maktab ta’limi boshqarmasining ishchi guruhi tuzilib, vaziyat o‘rganilmoqda.

O‘rganish ishlari yakunlariga ko‘ra, batafsil ma’lumot berilishi rejalashtirilgani aytildi.

Shuningdek, Bolalar ombudsmani ham holatni o‘rgana boshlaganini bildirdi.

Aniqlanishicha, holat Oltinko‘l tumanidagi 38-umumta’lim maktabida sodir bo‘lgan. 8-sinf o‘quvchisi Q.M. (o‘g‘il bola) sinf xonada pirotexnika vositalaridan foydalangan. Bunga javoban maktab direktori go‘yoki tarbiyaviy maqsadda Q.M.ni va sinfdagi boshqa bir necha bolalarni kaltaklagan.

Hozirda Andijon viloyati MMTB tomonidan ishchi guruhi tuzilib, holat o‘rganilmoqda. Shuningdek, Oltinko‘l tumani IIB tomonidan holat yuzasidan tergovga qadar tekshiruv harakatlari olib borilmoqda.

• Andijon
• Maktabgacha va maktab ta'limi vazirligi
• Ombudsman