Ijtimoiy tarmoqlar va ayrim axborot manbalarida Toshkent viloyatining Angren shahrida maktab o‘quvchisiga daydi it hujum qilgani, oqibatda bola og‘ir jarohatlar tufayli vafot etgani haqida xabarlar tarqaldi.

Toshkent viloyati hokimligi mazkur holat yuzasidan rasmiy munosabat bildirib, hodisa bo‘yicha tegishli tashkilotlar tomonidan o‘rganish ishlari olib borilayotganini ma’lum qildi.

Qayd etilishicha, voqeadan so‘ng shahar va viloyat hududida daydi hayvonlarni nazorat qilish bo‘yicha choralar kuchaytirilgan. Xususan, daydi itlarni tutish va ularni maxsus saqlash joylariga joylashtirish ishlari olib borilmoqda.

Hokimlik ma’lumotiga ko‘ra, o‘quvchiga hujum qilgani aytilayotgan it Angren shahar obodonlashtirish bo‘limining daydi hayvonlarni tutish guruhi tomonidan qo‘lga olingan. Tegishli hujjatlar rasmiylashtirilib, hayvon maxsus saqlash joyiga olib borilgan.

Shuningdek, viloyat hokimligi mas’ullari ishtirokida o‘tkazilgan shoshilinch yig‘ilishda obodonlashtirish xizmati, veterinariya bo‘limi, sanitariya-epidemiologik osoyishtalik xizmati hamda boshqa mas’ul idoralarga aholi xavfsizligini ta’minlash va bu kabi holatlarning oldini olish bo‘yicha tezkor choralar ko‘rish topshirilgan.

Hokimlik ta’kidlashicha, mazkur masala alohida nazoratga olingan bo‘lib, jamoatchilik xavfsizligini ta’minlash bo‘yicha zarur choralar ko‘rilmoqda.

• Angren
• Toshkent viloyati