AQSh ma’muriyati boshqa davlatlardagi 29 nafar elchilarni chaqirib olmoqda. Bu haqda AQSh Davlat departamentining ikki nafar xodimiga tayanib, The Associated Press xabar berdi.

Ularning ma’lumotiga ko‘ra, elchilarga o‘tgan hafta ularning vakolat muddati 2026-yil yanvarida tugashi haqida xabar berilgan.

Ularning barchasi AQShning sobiq prezidenti Jo Bayden ma’muriyati davrida ushbu lavozimlarga tayinlangan.Ma’lum qilishicha, lavozimdan chaqirib olinayotgan diplomatlar diplomatik xizmatdan bo‘shatilmaydi, biroq xohlashsa, boshqa tayinlovlar uchun Vashingtonga qaytishlari mumkin.

Davlat departamenti aniq nechta elchi chaqirib olinayotganini ochiqlamagan, ammo bu o‘zgarishlarni “har qanday ma’muriyatda bo‘ladigan odatiy jarayon” deya izohlagan.

Chaqirib olinayotgan elchilarning katta qismi Afrikadan. Ushbu qit’aning 13 ta davlatdagi elchilar almashtiriladi: Burundi, Kamerun, Kabo-Verde, Gabon, Kot-d’Ivuar, Madagaskar, Mavrikiy, Niger, Nigeriya, Ruanda, Senegal, Somali va Uganda.

Keyingi o‘rinda Osiyo turibdi. AQSh elchilari Osiyoning olti davlatidan chaqirilmoqda: Fiji, Laos, Marshall orollari, Papua–Yangi Gvineya, Filippin va Vetnam.

Yevropadan Armaniston, Shimoliy Makedoniya, Chernogoriya va Slovakiya kabi davlatlari elchilari chaqirib olinmoqda.

Shuningdek, Jazoir, Misr, Nepal, Shri-Lanka, Gvatemala va Surinam ham ushbu ro‘yxatdan joy olgan.

• AQSh
• Bayden
• Elchi
• Tayinlov
• Tramp