AQShning yangi tinchlik rejasi Donesk viloyatining to‘liq ravishda Rossiyaga topshirilishini, AQSh tomonidan Qrim va Donbassning Rossiya hududi sifatida rasman tan olinishini, shuningdek Zaporoje va Xerson viloyatlarida front chizig‘ini hozirgi holatda muzlatishni nazarda tutadi.

“Amerikalik rasmiylarning fikricha, agar urush davom etsa, Ukraina bu hududlarni baribir yo‘qotadi”, deb yozadi Axios.

Nashr ma’lumotlariga ko‘ra, Tramp ma’muriyati Donbassning Ukraina ixtiyoriy ravishda tark etadigan hududlari Rossiya nazoratiga o‘tishini, ammo ushbu hudud demilitarizatsiya qilingan zonaga aylanishini taklif qilmoqda

Zaporoje va Xerson viloyatlarida jangni front chizig‘ida muzlatish, keyinchalik Rossiya tomonidan Ukrainaga ba’zi hududlarni qaytarish istiqboli ham taklif qilingan.

“AQSh Qrim va Donbassni Rossiya hududi sifatida rasman tan olishga tayyorligini, bunga Yevropadagi ittifoqchilari nomidan ham rozilik berishini va’da qilmoqda, ammo Vashington Ukrainani bunga majburlamaydi”, deb yozadi Axios.

Bu imtiyozlar evaziga AQSh Ukraina va Yevropaga xavfsizlik kafolatlarini taklif qilmoqda, ammo ularning aniq mazmuni hozircha ma’lum emas.

• AQSh
• Qrim
• Rossiya
• Ukraina