AQSh razvedkasi "Vagner" "Hizbulloh"ni Rossiya havo mudofaa tizimi bilan ta’minlashi mumkinligidan xavotirda.

"Wall Street Journal" gazetasining amerikalik rasmiylarga tayanib yozishicha, AQSh razvedkasi Rossiyaning "Vagner" va Livanning "Hizbulloh" guruhlarining Isroilga qarshi hamkorligidan xavotirda.

Nashrning yozishicha, AQSh razvedka xizmatlari "Vagner" "Hizbulloh"ga G‘arbda SA-22 nomi bilan mashhur bo‘lgan Rossiya havo mudofaa tizimini yuborishi mumkinligi haqida ma’lumot olgan. Rossiyada u "Pansir-S1" deb ataladi — bu havo mudofaasi raketa va qurol tizimidir.

“Amerika rasmiylaridan biri Vashington ushbu tizimni yuborish ma’lumoti tasdiqlanmaganini aytdi. Ammo u "Vagner" va "Hizbulloh" o‘rtasidagi muzokaralarni kuzatib boradi va bunday ta’minot ehtimoli katta xavotir uyg‘otadi”, — deyiladi nashrda.

Gazetaning eslatishicha, Qo‘shma Shtatlar o‘zining samolyot tashuvchi kemasini Sharqiy O‘rta yer dengiziga jo‘natgan va shu tariqa "Hizbulloh" XAMASning Isroilga qarshi urushida faol ishtirok etishiga yo‘l qo‘ymaslikka harakat qilgan.

WSJning qo‘shimcha qilishicha, "Vagner" yollanma askarlari Suriyada harakat qilishda davom etmoqda, u yerda Eron tomonidan qo‘llab-quvvatlanadigan harbiylashtirilgan "Hizbulloh" guruhi a’zolari ham mavjud.

• AQSh
• Falastin
• Isroil
• Suriya
• Urush
• armiya
• harbiy xizmat
• razvedka