Qo‘shma Shtatlar Kongressining Respublikachi va Demokratik partiyalari vakillaridan iborat senatorlar guruhi Rossiyaning muzlatilgan 300 mlrd dollardan ortiq aktivlarini musodara qilish va ularni Ukrainaga yordam sifatida yo‘naltirishga chaqirdi.

Nashrga ko‘ra, senatorlar bu masala yuzasidan AQSh davlat kotibi Marko Rubioga maktub yo‘llagan. Qayd etish joizki, shu paytga qadar Vashington Kiyevni faqat Rossiyaning muzlatilgan aktivlaridan tushgan daromadlar orqali qo‘llab-quvvatlab kelayotgan edi.

Senatorlar, shuningdek, Rossiyaga bosimni kuchaytirish va urushni to‘xtatish uchun Oq uy qanday moliyaviy vositalardan foydalanishga tayyor ekanini aniqlashga harakat qilmoqda.

Maktubga respublikachi senatorlar Todd Yang va Lindsi Grem, shuningdek, demokratlar Richard Blyumental va Tim Keyn imzo chekkan. Reuters’ning ta’kidlashicha, bu maktub yuqori lavozimli respublikachilarning Moskvaga nisbatan keskin choralar ko‘rishga ochiq chaqiriq qilishining kamdan-kam uchraydigan misollaridan biri hisoblanadi.

• AQSh
• Rossiya
• Senator
• Ukraina