AQSh prezidenti Jo Bayden Isroil bosh vaziri Binyamin Netanyaxuning G‘azo sektoridagi harakatlarini xato deb atadi.Bu haqda “Anadulu” xabar berdi.

“Menimcha, uning qilayotgan ishi xato. Men uning yondashuviga qo‘shilmayman”, dedi Oq uy rahbari AQShda ispan tilida ko‘rsatuvlar olib boruvchi “Univision” telekanaliga bergan intervyusida.

 Bayden Isroilni G‘azoda zudlik bilan o‘t ochishni to‘xtatish va eksklavga gumanitar yordamning to‘siqsiz kirishini ta’minlash uchun choralar ko‘rishga chaqirdi.

 “Odamlarning sog‘lig‘i va oziq-ovqatga bo‘lgan ehtiyojlari qondirilmasligini oqlab bo‘lmaydi. Bu zudlik bilan amalga oshirilishi kerak”, - dedi AQSh prezidenti.

Jo Bayden 4-aprel kuni Isroil Vazirlar Mahkamasi rahbari bilan telefon orqali suhbatda “G‘azoda zudlik bilan o‘t ochishni to‘xtatishni ta’minlash” zarurligini ta’kidladi va Isroilni “o‘t ochishni to‘xtatish bo‘yicha chora-tadbirlar ko‘rishga” chaqirdi.

 Oq uy rahbari, shuningdek, Isroilning World Central Kitchen (WCK) xalqaro gumanitar tashkilotining 7 nafar xodimini o‘ldirgani masalasini ham ko‘tarib, mintaqada faoliyat yuritayotgan WCK va gumanitar yordam tashkilotlariga hujumlarni qabul qilib bo‘lmas deb atadi.

• Bayden
• Isroil