Noodatiylik va hashamat tushunchasi insonlarni qadim zamonlardanoq ohangrabo kabi oʻziga tortib keladi. Dunyoda shunday qimmatbaho mehmonxonalar borki, ularda bir kecha tunab qolish uchun bir necha ming dollarning bahridan kechishga tayyor boʻlishingiz kerak.

7-oʻrin. Birlashgan Arab Amirliklari – “Burj al-Arab” mehmonxonasi

Bir kecha tunash narxi – $18 000

Yelkan shaklidagi mashhur mehmonxona Dubayning bosh timsoliga aylanib ulgurgan. Mehmonxonaning ichki qismi qizil yogʻochdan qoʻl mehnati asosida ishlangan jihozlar bilan toʻldirilgan, polga haqiqiy marmar terib chiqilgan. Bu yerdagi xonalarning oʻz lifti ham bor desak ishonasizmi?

Har bir xonaga 4 karatli oltin bilan qoplangan planshetlar, 21 dyuymli iMac kompyuterlari va interfaol televizorlar joylashtirilgan.

6-oʻrin. London – “The Connaught” mehmonxonasi

Bir kecha tunash narxi – $23 500

Ushbu mehmonxonaning ichki dizayni jahonga dongʻi ketgan ijodkor Devid Kollinz tomonidan ishlab chiqilgan. Bu yerga yoʻl olgan mehmonlarni aeroportdan shaxsiy haydovchi kutib oladi, ularga maxsus sovgʻalar va yangi uzilgan guldasta taqdim etiladi. Toʻlov amalga oshirilganidan soʻng xonaning yangi sohibiga SPA-muolajalari, 2 ta Mishlen yulduziga ega boʻlgan shaxsiy oshpaz, xonaning oʻzidan turib dunyoning istalgan nuqtasiga bogʻlanish imkoniyati taqdim etiladi.

5-oʻrin. Fiji – “Laucala Island Resort” mehmonxonasi

Bir kecha tunash narxi – $25 000

“Laucala Island Resort” mehmonxonasini “Erdagi jannat” deya taʼriflaydilar. Mazkur orol hududida umumiy hisobda 25 ta villa joylashgan boʻlib, bu yerda dengizni tomosha qilish, tabiat qoʻynida hordiq chiqarish mumkin. Turli xalq oshxonalarini oʻzida jamlagan 5 ta hashamatli restoran, SPA markazlar, golf maydonchalari, chavandozlik maktabi va dayving markazi ham mehmonlar xizmatida boʻladi.

4-oʻrin. Bagama – “Atlantis Paradise Island Resort” mehmonxonasi

Bir kecha tunash narxi – $ 25 000

“Atlantis Paradise Island Resort”ning oʻziga xos tomoni shundaki, u butun boshli shaharni yodga soladi va Karib dengizi hududidagi eng katta mehmonxona hisoblanadi. Inshoot ichida 4000 ta xona, 30 dan ortiq restoran, 10 ta tennis korti, 11 ta basseyn va golf maydonchasi mavjud. Mehmonxonaning shaxsiy suv osti tunneli ham bor, bu yerda akulalar, skatlar va boshqa turdagi baliqlarni soatlab kuzatish mumkin.

3-oʻrin. Nyu-York – “Four Seasons” mehmonxonasi

Bir kecha tunash narxi – $34 000

Mehmonxona hududidagi eng katta nomer – 400 metrlik pentxaus binoning 52-qavatida joylashgan. Derazadan tashqariga qarab Manxettenning osmonoʻpar binolarini tomosha qilish mumkin. Mehmonlarga qulaylik yaratish maqsadida ularga shaxsiy haydovchi va mashina taqdim etiladi, ulov 24 soat davomida uzluksiz ravishda mehmonning xizmatida boʻladi.

2-oʻrin. Gretsiya – “Grand Resort Lagonissi” mehmonxonasi

Bir kecha tunash narxi – $35 000

Ushbu hashamatli mehmonxona oliy darajada xizmat koʻrsatishi va betakror tabiati bilan mashhurlikka erishgan. Bu yerda oʻz vaqtida Leonardo di Kaprio, Mel Gibson kabi taniqli shaxslar hordiq chiqarganlar. Mehmonxona hududidagi ulkan basseyn, 10 ta restoran, fitnes markazi va dayving klub mehmonlarga tun-u kun xizmat koʻrsatadi. Mehmonxona xodimlari esa rus, ingliz, italyan, fransuz, olmon va grek tillarida muloqot qiladilar.

1-oʻrin. Fransiya – “Grand Hatt Martinez”

Bir kecha tunash narxi – $45 000

Mehmonxonadagi maxsus pentxausning kattaligi 300 kv.metrni tashkil qiladi. Art-deko uslubida yaratilgan dizayn, devorlardagi noyob va qimmatbaho suratlar, ulkan basseyn va sokin muhit mehmonlarni oʻziga jalb qilib keladi.

Tashrif buyuruvchilar bu yerdagi zamonaviy restorandan tanovul qilishlari va Lotin Amerikasi oshxonasining mazali taomlariga baho berishlari mumkin.

Mehmonxonalarning narxi ularning nufuzi, mashhurligi, yaratilgan sharoitlar darajasidan tortib bu yerning restoranlarida faoliyat olib boruvchi oshpazlar malakasi-yu mahoratiga ham bogʻliq boʻlishi mumkin. Kimdir hordiq onlarining mukammal oʻtishi uchun kattagina pulning bahridan kechishga tayyor, kimdir esa pulni tejash maqsadida betakror maskanda dam orzusini unutishga qaror qiladi. Aslida bunga katta eʼtibor berishning ham keragi yoʻq. Zero, har bir insonning oʻz dunyoqarashi, oʻz fikrlari va hayot tarzi bor. Bu boradagi tanlov imkoniyati ham har kimning oʻz ixtiyorida.

• Mehmonxona
• qiziqarli
• sayohat