BMTning falastinlik qochqinlarga yordam berish ishlarini tashkil etish bo‘yicha Yaqin Sharq agentligi (UNRWA) Falastin-Isroil chegarasidagi “Kerem-Shalom” nazorat-o‘tkazish punkti orqali gumanitar yordam yetkazib berish to‘xtatilganligi haqida xabar berdi.

Bu haqda 1-dekabr kuni tashkilot bosh komissari Filipp Lazzarini X ijtimoiy tarmog‘ida ma’lum qilgan.

“Kerem-Shalom” orqali yo‘l bir necha oy davomida tashkilot xodimlari uchun xavf tug‘dirib kelgan.

“Ushbu qaror muhtojlik tez sur’atlarda o‘sib borayotgan qiyin bir paytda qabul qilindi. Gumanitar yordamni yetkazib berish, xodimlar uchun hech qanday xavf tug‘dirmasligi kerak”, – degan Lazzarini.

Bosh komissar xodimlar va gumanitar yuklarni himoya qilish uchun javobgarlik Isroilda ekanligini ta’kidlagan. Lazzarini so‘zlariga ko‘ra, davlat hokimiyati organlari yuklarning G‘azoga xavfsiz yetkazib berilishini ta’minlashi zarur.

• BMT
• Falastin
• Gumanitar yordam
• Isroil