Kichik yoshdagi bolalarga qanday mevalar berish tavsiya etiladi? Mevalar tarkibida vitaminlar, minerallar va boshqa oziq moddalar mavjud bo‘lib, bu bolalar rasionining ajralmas qismi bo‘lishiga asosiy sabab hisoblanadi. 

Farzandingizga meva berishni qachon boshlashingiz kerak? 

Birinchi marta chaqaloq olti oylikdan boshlab mevalarni ta’tib ko‘rishi mumkin. Faqat farzandingizning holatini nazorat qilgan holda yarim choy qoshiq meva pyuresi bilan boshlashingiz kerak. Agar bola reaksiyasi barqaror bo‘lsa, unda pyure miqdorini asta-sekin oshirish mumkin. 

Bir komponentli meva pyurelari bolalar uchun mos keladi yoki xohishingizga ko‘ra o‘zingiz yangi mevalardan pyure tayyorlashingiz mumkin. Birinchi marta iste’mol qilishga yashil olma yoki sariq nokni tanlaganingiz ma’qul. Sitrus va qizil mevalardan qochish kerak.

Bola yetti oylik bo‘lganidan so‘ng danakli mevalarga murojaat qilishingiz mumkin. Masalan, o‘rik, shaftoli, olxo‘ri. Lekin ularni ham maydalab berish tavsiya etiladi. Bundan tashqari bolakay bananni ham yoqtirishi mumkin, shunday ekan uni ham sinab ko‘rish yaxshi foyda beradi. 

To‘qqiz oylikdan boshlab bolalar gilos va qulupnayni bajonidil iste’mol qiladi. Bu davrda farzandingizga ananas yoki kivi kabi ekzotik mevalarni berishingiz mumkin. 

Sitrus mevalari esa faqat 11-12 oylikdan boshlab berilishi tavsiya etiladi. 

Kichkintoy uchun qaysi mevalar eng foydali? Quyidagi mevalar bola uchun foydaliroq bo‘ladi: 

1. Olma. Bu meva B va C vitaminlariga boy bo‘lib, tarkibida mineral va oziq moddalar mavjud. Olma organizmdan toksik moddalarni chiqarib tashlashga yordam beradi, oshqozon faoliyatini va ishtahani yaxshilaydi. Olma po‘stlog‘ida ko‘plab foydali moddalar mavjud, shuning uchun bolaning tishlari chiqishi bilanoq, mevani po‘stlog‘i bilan birga berish tavsiya etiladi. 

2. Limon. Nordon ta’mi tufayli limonni bolaning rasioniga kiritish qiyin, ammo unda juda ko‘p miqdorda C vitamini mavjud bo‘lib, shamollashga qarshi yaxshi vosita hisoblanadi. Limon tufayli bola mavsumiy shamollash va epidemiyalarga qarshi yaxshi kurashadi.

3. Banan. Ular bir yoshgacha bo‘lgan bolalarning rasioniga qat’iy kiritilgan. Banan temir, magniy va kaliyga boy. Asab tizimining ishini samarali qo‘llab-quvvatlaydi hamda endorfin ishlab chiqarishga hissa qo‘shadi. Agar bola ortiqcha vaznga moyil bo‘lsa, banan miqdori cheklanishi kerak.

4. Apelsin. Immunitet tizimini mustahkamlashga yordam beradi, vitamin yetishmasligida ozuqa moddalarini to‘ldiradi va infeksiyalarga qarshi samarali kurashadi. Apelsin iste’moli paytida bolaning holatini kuzatish juda muhim hisoblanadi, chunki bolalarda sitrus mevalariga allergiya ko‘p kuzatiladi. 

5. Nok. Nokda ko‘p miqdorda B vitamini, askorbin kislotasi, kalsiy, natriy va temir mavjud. Shuningdek, u oshqozon yaxshi ishlashiga xizmat qiluvchi moddalarni o‘z ichiga oladi. Nokni pishirib, kompot yoki shirinliklarga qo‘shish orqali bolaga berish mumkin.  

6. Ananas. Ananas tarkibida juda ko‘p askorbin kislotasi mavjud. Agar bola ortiqcha vazndan aziyat cheksa, unda shirinliklar o‘rnini ananas bilan almashtirish mumkin. Chunki u yog‘larni faol ravishda parchalaydi va ovqat hazm qilishini yaxshilaydi. Lekin konservalangan ananasdan voz kechganingiz ma’qul, sababi uning takibida shakar ko‘p, biroq vitaminlar kam. 

7. Mandarin. Minerallar va aminokislotalarga boy meva hisoblanadi. Ular yurak-qon tomir va asab tizimi faoliyatini yaxshilaydi, bolakayni energiya bilan ta’minlaydi, uni diqqatli va e’tiborli bo‘lishiga yordam beradi.

8. O‘rik. Bu meva pektin va fosforning eng katta manbai. O‘rik hujayralar yangilanishini tezlashtirishga yordam beradi, oshqozon osti bezini barqarorlashtiradi va immunitetni oshiradi. Bundan tashqari o‘rik tarkibidagi ozuqaviy moddalar bolaning ovqat hazm qilish tizimini yaxshilaydi. Ammo haddan ziyod ko‘p o‘rik iste’mol qilish diareyaga sabab bo‘lishi mumkin. Shuning uchun me’yor darajasi bilish muhim.

Xulosa o‘rnida shuni aytish mumkinki, mevalar bolaning kundalik rasioniga kiritilishi muhim sanaladi, chunki ular ko‘plab vitaminlar va ozuqaviy moddalarni o‘z ichiga oladi. Biroq, ularning barchasini bolaning yoshiga qarab berish tavsiya etiladi. Bundan tashqari, mevalarning rang-barangligi ham bolaning ishtahasiga ijobiy ta’sir ko‘rsatadi va ovqatga bo‘lgan qiziqishini oshiradi. Shunday ekan, farzandingizni baquvvat va sog‘lom bo‘lishini istasangiz uning kunlik rasionini mevalar bilan boyiting.
 

• Bola
• Meva
• salomatlik