Zamonaviy dunyoda bolalarning gajetlarga qaramligi borgan sari ortib bormoqda. Bu esa ko‘plab ota-onalarni tashvishga solishi tabiiy hol.

Ushbu maqolada psixologlarning smartfonlar bolalarga nima uchun foydali yoki zararli ekani, unga qaramlikning oldini olish yo‘llari haqida fikr-mulohazalari keltirilgan.

Gajetlar allaqachon kundalik hayotimizning bir qismiga aylanib ulgurgan. Tabiiyki, bolalar hayotida ham u mavjud. Lekin ko‘plab ota-onalar farzandlari telefonlardan uzoq vaqt foydalanishidan xavotirlanadi.

Xo‘sh, ota-ona farzandiga qaysi yoshda telefon yoki planshet bergani maʼqul? Keling, avval shuni aniqlashtirib olamiz.

Bolalar psixologi Susanna Barinovaning fikricha, gajetlar bolalar uchun ko‘p jihatdan foydali: ular rivojlanish va yangi bilimlarni o‘rganishga yordam beradi, dunyoqarashni kengaytiradi va hokazo. Farzandingizga ulardan to‘g‘ri foydalanishni o‘rgatish kerak, xolos.

“Besh yoshgacha bo‘lgan bolalarda umuman gajetlar bo‘lmasligi kerak. Maktabgacha va boshlang‘ich maktab o‘quvchilariga esa faqat ota-ona nazorati ostidagi gajetlardan foydalanishga ruxsat beriladi. Bunda telefondagi ilovalar bolaning xotirasi va boshqa aqliy qobiliyatlarini rivojlantirishga moslashgan bo‘lishi kerak”, deydi u.

Barinova o‘smirlarga gajetlardan foydalanishni taqiqlashga qarshi ekanini yozadi. Uning fikricha, bu bolani real hayotdan butunlay mahrum qilish bilan barobar.

Umuman olganda, bolalar uchun zamonaviy dunyoda gajetlarsiz yashash qiyin, lekin ota-onalar ular nima bilan mashg‘ul ekanligini nazorat qilishlari muhimdir.

Yana bir jihatga eʼtibor berish lozim. Bolalarning smartfonlarga qaramligiga baʼzi hollarda ota-onalar ham sababchi bo‘lishadi. Yaʼni, farzandlar telefondan foydalanish bo‘yicha ko‘pincha ota-onasidan o‘rnak oladi.

Bolalarning telefondan ko‘p foydalanishlarining yana bir sababi ularning do‘stlari bilan muloqot qilishlaridir. Buning uchun ijtimoiy tarmoqlarda guruhlar mavjud.

Shuni ham alohida taʼkidlash kerakki, ko‘plab bolalar internet va ijtimoiy tarmoqlar tufayli muvaffaqiyatga erishishga va o‘z imkoniyatlarini oshirishga harakat qilmoqdalar.

Siz bolalaringiz va ularning gajetlardan foydalanishini nazorat qilishingizdan qo‘rqmasligingiz kerak. Siz shunchaki ular bilan bu ishni ularning manfaati uchun qilayotganingizni uqtirishingiz lozim.

Neyropsixolog Tatyana Shtaynning fikricha, ota-onalar farzandlariga gajetlarsiz baxtli yashashni o‘rgatishlari mumkin. Telefonlar, planshetlar va kompyuterlarga qaramlikni rivojlantirmaslik kerak.

Mutaxassisning fikricha, fiziologik nuqtayi nazardan gadjetga qaramlikning shakllanish mexanizmi giyohvandlikning shakllanishi bilan bir xil.

• Bolalar
• Smartfon
• Telefon