Janubiy Koreyaning BTS guruhi “Disney” kompaniyasi bilan hamkorlikda bir nechta loyihalarni amalga oshiradi. Ular orasida hujjatli serial va toʻliq metrajli film ham bor. Loyihalar tayyor boʻlganidan soʻng “Disney” striming servislarida taqdim etiladi.

Hujjatli serialga “BTS Monuments: Beyond The Star” deya nom berilgan boʻlib, unda guruhning toʻqqiz yillik faoliyatiga oid muhim kadrlar jamlanadi. Hujjatli serialning taqdimoti joriy yilga rejalashtirilgan.

“Ushbu hamkorlik Osiyo-Tinch okeani mintaqasining yetakchi yulduzlari va mashhur kontent mualliflari bilan hamkorlik qilishga boʻlgan ijodiy intilishimizni namoyish etadi. Yangi loyihalar dunyoning turli burchaklaridagi tomoshabinlarga maʼqul kelishiga ishonamiz va oʻz servisimizda yanada koʻproq musiqiy kontent taqdim etish imkoniyatini sabrsizlik bilan kutamiz”, – deydi “Disney” kompaniyasi vakili Jessika Kam-Engl.

BTS guruhi vakillarining aytishlaricha, yangi loyihalar muxlislarga ularni yaqindan bilib olish imkoniyatini taqdim etadi.

• Shou-biznes
• mashhurlar