Buxoro xalqaro aeroporti direktori o‘rinbosari Shahboz Hayitov “O‘zbekiston 24” telekanaliga bergan intervyusida ma’lum qilishicha, Buxoroda yangi xalqaro aeroport 2027-yil birinchi choragida ishga tushirilishi mumkin.

Uning so‘zlariga ko‘ra, hozirda aeroportda 550 nafar xodim ishlaydi. 2026-yilgi reja bo‘yicha aviaqatnovlarni 15 foizga ko‘paytirish, 2026−2027-yillarda yangi aeroport qurib, ishga tushirish maqsad qilingan. Yangi aeroportni 2027-yil birinchi choragida ishga tushirish rejalashtirilyapti. U soatiga 2000 yo‘lovchiga xizmat ko‘rsatishi ko‘zda tutilgan.

Buxoro viloyati hokimi o‘rinbosari Jalol Arashovning ta’kidlashicha, aeroport bir vaqtning o‘zida soatiga 16 tagacha havo kemasini qabul qilish, haftasiga 100 dan ortiq reyslarni amalga oshirish imkoniyatiga ega bo‘ladi.

Eslatib o‘tamiz, Buxoro tumanida yangi xalqaro aeroport qurish loyihasi 2024-yilning may oyida taqdim etilgandi. O‘sha paytda loyiha qiymati 226 million dollarga baholanib, Davlat-xususiy sherikchilik asosida amalga oshirilishi ma’lum qilingandi.

• Aeroport
• Buxoro