Eronning rahbar organi — ekspertlar kengashi o‘ldirilgan Ali Xomanaiyning o‘g‘li Mo‘jtabo Xomanaiyni mamlakatning yangi oliy rahbari deb e’lon qildi. Bu haqda davlat organining bayonotida aytildi.

Ekspertlar kengashi Islom Respublikasining yangi oliy rahbarini tayinlash haqida qaror qabul qilgani haqidagi ma’lumotlar OAVda kengashning bir necha a’zosiga tayanib 8-mart tongda paydo bo‘lgandi. Bu xabar Ali Xomanaiy AQSh va Isroil tomonidan harbiy operatsiya chog‘ida o‘ldirilganidan bir hafta o‘tib tarqalgan, ammo uning aynan kim vorisi bo‘lishi aytilmagan edi.

Avvalroq, 3-mart kuni, 56 yoshli Mo‘jtabo Xomanaiy Eronning yangi oliy rahbari etib tayinlangani haqida DW manbalari xabar bergandi.

Isroil mudofaa armiyasi (SAXAL) 8 mart kuni o‘zining X ijtimoiy tarmog‘idagi mikroblogida Ali Xomanaiyning vorisi bo‘lgan har qanday shaxsni ta’qib qilish va’dasini yana bir bor takrorladi.

ABC News Trampning quyidagi so‘zlarini keltiradi: “Agar u bizning roziligimizni olmasa, u uzoq turmaydi. Biz har 10 yilda bu masalaga yana qaytishga majbur bo‘lmasligimizga ishonch hosil qilishni istaymiz. Men besh yildan keyin bu masalaga yana qaytib, xuddi shu ishni qilishga majbur bo‘lishimizni yoki, bundan ham yomoni, ularga yadroviy qurolga ega bo‘lishga imkon berishimizni istamayman”.

Bundan avval Tramp Eronda hokimiyatga Mo‘jtabo Xomanaiy kelishiga qarshi ekanini va mamlakatning yangi rahbarini tanlashda shaxsan ishtirok etish niyatida ekanini aytgan edi.

Islom Respublikasini 1989-yildan beri boshqarib kelgan Ali Xomanaiy 28-fevral kuni Isroil va AQShning Eronga qarshi urushi boshida o‘ldirilgandi.

Mamlakatning oliy rahbari Eronda ekspertlar kengashi a’zolari tomonidan tayinlanadi. Islom huquqi sohasida mutaxassis deb hisoblanadigan 88 kishidan iborat ushbu davlat organi Eron fuqarolari tomonidan har sakkiz yilda bir marta saylanadi.

• Eron
• Rahbarlik
• Tayinlov