Tefal. Hozirda elektr choynaklar xalq orasida xuddi shu nom bilan ataladi. Bu so‘z aslida elektr choynak maʼnosini bermaydi, u xalqaro brend, savdo belgisi. Bu belgi ostida faqat elektr choynaklar emas, turli maishiy uskunalar va idishlar ishlab chiqariladi.

Pampers postsovet davlatlarida o‘z mahsulotlarini shunchalik faol reklama qildiki, boshqa brendlar uning soyasida qolib ketdi. Natijada har qanday taglik mahsulotlarini pampers deb ataydigan bo‘lib qoldik.

Biz hozirda jakuzi deb nomlaydigan vanna turi aslida shu vannalarni birinchi bo‘lib ishlab chiqargan kompaniya nomi bo‘lgan. Kompaniyaga 1915 yilda Italiyadan kelgan, familiyasi Jakuzzi (to‘g‘ri o‘qilishi Yakutsi) bo‘lgan aka-uka muhojirlar tomonidan asos solingan.

Fyon — tog‘lardan vodiylarga esadigan iliq va quruq shamol. XX asr boshidan beri Germaniyada Fön brendi ostida sochni qurituvchi moslamalar ishlab chiqarila boshlandi. Bu so‘z nafaqat nemis tilida, balki rus va o‘zbek tillarida ham shu moslamani ataydigan so‘zga aylanib ulgurdi.1970 yillarda SSSR bozorida ilk marotaba qog‘ozdan nusxa ko‘chirish mashinalari paydo bo‘ldi — uning nomi Xerox edi. Endilikda esa aksar postsovet mamlakatlarida ushbu xizmat turi kserokopiya deb ataladi.

Odatda ko‘p qavatli uylar hojatxonasida ishlatiladigan qurilma — unitaz ham qachonlardir kompaniya nomi bo‘lgan. SSSR payti aynan Unitas brendi mamlakatga ushbu turdagi santexnikani olib kirgan.

Flomaster so‘zi XX asrning ikkinchi yarmida rangli siyoh va markerlar ishlab chiqaruvchi Flo-Master savdo belgisidan kelib chiqqan.

Yuqoridagi baʼzi atamalar ommalashishiga ularning asl nomi aytishga qiyinligi ham sabab bo‘lgan bo‘lishi mumkin. Xalq tili soddalikni yoqtiradi.

• Brend