Qirollik saroyi byurosi bayonotiga ko‘ra, 93 yoshli ona qirolicha Sirikit Bangkokdagi shifoxonada vafot etdi. U 2012-yilda insultga uchragan va shundan beri deyarli jamoatchilik hayotida ishtirok etmagan. Uning eri, qirol Phumipon Adulyadet, 2016-yil oktyabr oyida vafot etgan edi.

Tailand bosh vazirining xabar berishicha, mamlakatdagi barcha hukumat idoralarida davlat bayrog‘i bir oy tushirilgan holda turadi, davlat xizmatchilari esa bir yil davomida motam tutadi.

“Sirikit Tailandda katta hurmat va muhabbatga sazovor bo‘lgan. Uning portretlari uylar, ofislar va jamoat joylarini bezab turgan, tug‘ilgan kuni esa mamlakatda “Onalar kuni” sifatida nishonlangan. Sirikit kambag‘al aholiga yordam berish, an’anaviy hunarmandchilik an’analarini saqlash va atrof-muhitni muhofaza qilish bo‘yicha qirollik loyihalarini nazorat qilgan”, – deya yozmoqda Associated Press.

• Bangkok
• Qirolicha
• Tailand