O‘z mustaqilligini e’lon qilgan Donetsk va Lugansk Xalq Respublikalarida Rossiyaga “qo‘shilish” bo‘yicha zudlik bilan referendum o‘tkazilishi kutilmoqda. Bu haqda “Meduza” nashri xabar berdi.

Qayd etilishicha, bunday taklif bilan 19 sentyabr kuni ikki viloyat jamoat palatalari DXR va LXR rahbarlari Denis Pushilin hamda Leonid Pasechnikka murojaat qilgan. DXR va LXR rahbarlari bunday referendumlarni 2022 yilning mart oyida o‘tkazish rejalarini o‘zaro muhokama qiladi.

DXR rahbari Denis Pushilin LXR rahbariga referendumlarga birgalikda tayyorgarlik ko‘rishni taklif qildi. Pushilin o‘zining Telegram kanalida Leonid Pasechnik bilan suhbati aks etgan videoni joylashtirdi. Yozuvda DXR rahbari “ba’zi harakatlarni sinxronlashtirish” va o‘z-o‘zini mustaqil, deb e’lon qilgan respublikalar hokimiyati sa’y-harakatlarini birlashtirishni taklif qilgan.

Xerson viloyatining ishg‘ol ma’muriyati ham imkon qadar tezroq Rossiya bilan “qo‘shilish” bo‘yicha referendum o‘tkazishni istayotganini bildirdi. Bu haqda Xerson viloyatining Rossiya nazoratidagi ma’muriyati rahbari o‘rinbosari Kirill Stremousov bayonot berdi. Uning so‘zlariga ko‘ra, bosib olingan hududlarda “Rossiya ketishidan qo‘rqqan” va “o‘zlarini tashlab ketmasligiga ishonch hosil qilishni istaydigan” aholi referendum o‘tkazishni so‘ramoqda.

Rossiya Federasiyasi Davlat Dumasi LXRda referendum 2022 yilning kuzida o‘tkazilishiga ruxsat berdi. Bu haqda Davlat Dumasi deputati Viktor Vodolaskiy ma’lum qildi. Deputatning so‘zlariga ko‘ra, LXRning saylov tizimi referendumga 100 foiz tayyor (u DXRda referendum o‘tkazish masalasiga izoh bermagan). DXR va LXR jamoat palatalarida ovoz berish sanasi hozircha e’lon qilinmadi. Shu bilan birga, DXR palatasiga ovoz berish bir necha kunga cho‘zilishi mumkinligi aytildi.

Ukraina hukumati Donetsk va Lugansk ham Qrim kabi Ukraina hududi hisoblanadi, deb javob berdi. Bu haqda Ukraina prezidenti devoni rahbari maslahatchisi Mixail Podolyak ma’lum qildi.

“Rossiya propagandistlari “referendum”ni davo sifatida sevib qolishdi. Ularga yomon xabarim bor. Global konsensus va xalqaro huquq mavjud. Bu aniq: Donetsk, Lugansk, Qrim bu Ukrainadir. Bayroqlarni qayta bo‘yashga urinishlar uydirma bo‘lib, biz uchun ham, hamkorlar uchun ham hech narsani o‘zgartira olmaydi”, – dedi u.

Sentyabr boshida Kremlga yaqin manbalar Rossiya rahbariyati Ukrainaning Donetsk, Lugansk, Zaporojye, Xarkov va Xerson viloyatlari bosib olingan hududlarini “anneksiya qilish” bo‘yicha referendumga tayyorgarlikni to‘xtatganini ma’lum qilgandi. Rasmiylar bu qadamga Ukraina qo‘shinlarining sentyabr oyi boshida muvaffaqiyatli qarshi hujumini sabab sifatida ko‘rsatgan.

• Donetsk
• Lugansk
• Referendum\
• Rossiya
• Ukraina