Farg‘ona viloyatida erkak tushida ayolining o‘ziga nisbatan xiyonat qilganini ko‘rib, uxlab yotgan xotinini o‘ldirdi. Bu haqda “Bu kun” xabar berdi.

Qayd etilishicha, ushbu voqea sodir bo‘lgan tunda er-xotin har doimgidek uxlab yotgan. Aynan o‘sha tunda ular orasida hech qanday kelishmovchilik yoki janjal bo‘lmagan. Tonggi soat 4:30 da tushida ayolining xiyonatini ko‘rgan erkak uyg‘onib ketgan. U avvaldan yostig‘i tagida pichoq olib yotishni odat qilib olgan.

Erkak uyg‘ongach, yostig‘i ostida turgan pichoqni olib, ayoliga 13 marta urgan. Harakatlari xato ekanini anglagan erkak tibbiy yordamga o‘zi murojaat qilgan.

Shifokorlar yetib kelganda ayolning joni allaqachon uzilib bo‘lgan. Ma’lum qilinishicha, sudlanuvchining bu kabi gumonlari o‘sha kuni paydo bo‘lmagan. Avvaldan ayoli bilan asossiz gumonlar sabab janjallashib kelgan.

Uch bolaning otasi bo‘lgan sudlanuvchi Jinoyat kodeksining 97-moddasi (qasddan odam o‘ldirish) bilan 16 yil muddatga ozodlikdan mahrum qilingan.

• Farg‘ona