Senatning 39-yalpi majlisida ma’muriy jarimalarni to‘lashda aholiga qo‘shimcha qulayliklar yaratishga oid qonun muhokama qilindi.

Qonun bilan “Ma’muriy javobgarlik to‘g‘risida”gi kodeksning 332 prim 1 moddasi, ya’ni jarima solish to‘g‘risidagi qarorni ijro etishning soddalashtirilgan tartibi yangi tahrirda bayon etilmoqda.

2023-yil 1-maydan boshlab, huquqbuzar jarima solingan vaqtdan e’tiboran 15 kun ichida jarimaning 50 foizini, 30 kun ichida 70 foizini ixtiyoriy ravishda to‘lasa, u jarimaning qolgan qismini to‘lashdan ozod qilinishi belgilanmoqda. Agar huquqbuzar bir oylik muddatni o‘tkazib yuborsa, jarimaning to‘liq midorini to‘lashi shart bo‘ladi.

Mazkur tartib sud qarorlariga nisbatan qo‘llaniladigan jarimalar uchun ham tatbiq etiladi.

Qonunga binoan, ikkita istisno holatda huquqbuzar haydovchi jarimani chegirmasiz to‘lashiga to‘g‘ri keladi. Ya’ni, transport vositalarini mast holda boshqarganlik uchun, haydovchi va yo‘l harakatining boshqa ishtirokchisining mastligi yoki mast emasligini aniqlashda tekshiruvdan o‘tishdan bo‘yin tovlagan taqdirda jarima yengillashtirilmaydi.

• Jarima
• Qonun
• Senator