Turkiya prezidenti Rajab Toyyib Erdo‘g‘an Nyu-Yorkda tadbirkor va Tesla kompaniyasining egasi Ilon Mask bilan uchrashdi. Bu haqda Turkiya prezidenti huzuridagi Jamoatchilik bilan aloqalar boshqarmasi X ijtimoiy tarmog‘ida xabar berdi.

“Prezidentimiz janob Rajab Toyyib Erdo‘g‘an Nyu-Yorkdagi Turklar uyida Tesla va SpaceX asoschisi Ilon Maskni qabul qildi”, – deyiladi xabarda.

Uchrashuvda prezident tadbirkorni Turkiyada yettinchi Tesla elektromobil ishlab chiqarish zavodini ochishga chaqirgan. Turkiya rahbari Turkiyaning kosmik dasturi doirasida mamlakatning SpaceX bilan hamkorligi potensial rivojlanishini ta’kidlagan va Maskni sentyabr oyi oxirida Turkiyaning Izmir shahrida bo‘lib o‘tadigan texnologiya ko‘rgazmasida ishtirok etishga taklif qilgan.

Mask uchrashuvga o‘zining X Æ A-12 ismli o‘g‘lini ham  olib kelgan, buni fotosuratlar va videolarda ko‘rish mumkin. Uchrashuv atigi 45 daqiqa davom etgan.

Qayd etilishicha, prezident Maskga Turkiyani raqamlashtirish konsepsiyasi va sun’iy intellekt sohasidagi milliy strategiya haqida ham gapirib bergan.

Bu Turkiya rahbari va tadbirkorning birinchi uchrashuvi emas. O'tgan yil oxirida ular Qatarda jahon chempionatining final uchrashuvida to'qnash kelishgandi. Suhbat tafsilotlari noma'lum.

• Erdogʻan
• Ilon_Mask
• Nyu-York
• SpaceX
• Tesla
• Turkiya