HAMAS siyosiy byurosi rahbari Ismoil Haniya Tehronda o‘ldirilgan. Bu haqda Eronning Mehr agentligi xabar berdi.

Mahalliy matbuotning yozishicha, siyosatchi va uning tansoqchilaridan biri Tehrondagi qarorgohiga uyushtirilgan hujumda halok bo‘lgan. HAMAS siyosiy byuro rahbarining o‘limini tasdiqlab, bunda Isroilni ayblagan.

Haniyaning qanday o‘ldirilgani aniq ma’lum emas. Bir nechta OAVlar bu Haniya turgan uyga raketa hujumi natijasida sodir bo‘lganini da’vo qilmoqda, lekin ma’lumotlarga aniqlik kiritilmagan.

Eronning Fars agentligi Haniya havo hujumi natijasida halok bo‘lganini da’vo qilmoqda. Zarba, ehtimol, samolyotdan foydalanmasdan boshqa davlat hududidan amalga oshirilgan, deydi Livanning Al Mayadeen telekanali.

Xabar qilinishicha, Falastin qarshilik harakati yetakchisi Eronning saylangan prezidenti Ma’sud Pezeshkiyanning inauguratsiya marosimida ishtirok etish uchun Tehronga kelgan.

Isroil armiyasi vakillari CNN telekanaliga Tehronda HAMAS siyosiy byurosi rahbari Haniyaning o‘ldirilishi haqidagi xabarga izoh berishdan bosh tortgan va “xorijiy OAV xabarlariga javob bermayapmiz”, – degan.

HAMAS siyosiy byurosi rahbari o‘ldirilganidan keyin Eron oliy rahbari qarorgohida Milliy xavfsizlik oliy kengashining favqulodda yig‘ilishi bo‘lib o‘tmoqda.

• Eron
• Falastin
• Isroil