Sirdaryo viloyati bojxona boshqarmasining Kontrabandaga qarshi kurashish bo‘limi tomonidan olingan tezkor ma’lumotlar asosida yirik miqdordagi mobil qurilmalarning noqonuniy olib kirilishi fosh etildi. Unga ko‘ra, huquqni muhofaza qiluvchi organ xodimlari tomonidan Sirdaryo tumanida maxsus tadbir o‘tkazildi. M-39 avtomobil yo‘lida harakatlanayotgan, oldindan kuzatuvga olingan fuqaroga tegishli Spark avtomashinasi to‘xtatilib, belgilangan tartibda ko‘zdan kechirilganda avtomobil yukxonasida bojxona rasmiylashtiruvi hamda IMEI ro‘yxatidan o‘tmagan, hech qanday hujjatlari bo‘lmagan xorijda ishlab chiqarilgan smartfonlar borligi aniqlandi.

Olib borilgan tekshiruvlar davomida jami 35 dona, jumladan, 30 dona “iPhone 17 Pro Max”, 5 dona “iPhone 17 Pro” modellari borligi ma’lum bo‘ldi.

Dastlabki hisob-kitoblarga ko‘ra, ushbu telefonlarning umumiy qiymati 700 million so‘mni tashkil etmoqda. Hozirda mazkur holat yuzasidan ashyoviy dalillar vaqtincha saqlovga olinib, surishtiruv harakatlari davom ettirilmoqda.

• Bojxona
• Sirdaryo
• Telefon
• iPhone