“Yaqin Sharq mintaqasida yuzaga kelgan notinch vaziyat sababli O‘zbekiston elchixonasi tomonidan Quvaytdagi 42 nafar yurtdoshimiz avtobus orqali Saudiya Arabistoniga o‘tkazilib, so‘ng ushbu davlatdan mamlakatimizga qaytarish chora-tadbirlari amalga oshirildi”, – deb xabar qilmoqda “Dunyo” agentligi.

16 nafar kattalar va 26 nafar voyaga yetmaganlardan iborat o‘zbekistonliklar shu yilning 9-mart kuni Toshkent vaqti bilan soat 23:50 da Quvaytdan avtobus orqali yo‘lga chiqib, 10-mart kuni soat 11:40 da Ar-Riyozdagi Podshoh Xolid nomidagi xalqaro aeroportga yetib kelgan.

Elchixona diplomatlari ularga yengillik yaratish hamda ularning Quvayt va Saudiya Arabistoni hududida erkin harakatlanishidagi ehtimoliy qiyinchiliklarni bartaraf etish maqsadida, mazkur davlatlarning vakolatli organlariga tegishli notalar chiqargan.

Shu bilan birga, 12 soatga yaqin bo‘lgan ushbu safar davomida fuqarolarga Quvayt hamda Saudiya Arabistoni davlat chegaralaridan o‘tish jarayonlarida ko‘maklashish, ularga Ar-Riyoz aeroportida zarur tashkiliy-amaliy yordam ko‘rsatish maqsadida Elchixonaning ikki nafar diplomati hamrohlik qilgan. Fuqarolarning vatanga qaytishini ta’minlash maqsadida O‘zbekiston Migratsiya agentligi tomonidan tegishli aviachiptalar xarid qilinadi.

10-mart kuni Ar-Riyoz shahridagi Qirol Xolid xalqaro aeroportida Elchixona diplomatlari tomonidan 42 nafar fuqaroga Jidda shahriga uchish uchun ro‘yxatdan o‘tish jarayonlarida zarur konsullik-huquqiy va tashkiliy ko‘mak ko‘rsatilib, 9 nafar fuqaro SV1081 reysi hamda 33 nafar fuqaro SV1035 reysi bilan Jiddaga muvaffaqiyatli kuzatilgan.

Shuningdek, ushbu 42 nafar fuqarolar Jidda shahridan O‘zbekistonga qaytish aviabiletlari bilan ta’minlangan va joriy yilning 11-mart kuni Jidda – Toshkent aviareysi orqali O‘zbekistonga qaytadi.

“Shu o‘rinda aytish lozimki, mintaqadagi beqaror vaziyat tufayli oila boshliqlari farzandlarining xavfsizligidan xavotirlanib, faqat oila a’zolarini O‘zbekistonga yuborishga qaror qilgan. Shuningdek, ish beruvchilar tomonidan mehnat faoliyatini to‘xtatishga ruxsat berilmagani hamda bunday talab bilan murojaat qilish kelgusida fuqarolarimizning kasbiy faoliyati va huquqiy maqomiga salbiy ta’sir ko‘rsatishi mumkinligi aniqlandi. Shu sababli, ayni bosqichda faqat aksariyat ayollar va bolalardan iborat fuqarolar guruhining Vatanga qaytishi tashkil etilmoqda”, – deyiladi xabarda.

• Elchixona
• Konsullik
• O‘zbekistonlik