“Hududgaz Qoraqalpog‘iston” gaz ta’minoti filialida 251,5 mlrd so‘mlik zarar aniqlanib, holat yuzasidan jinoyat ishi qo‘zg‘atildi. Bu haqda Bosh prokuratura huzuridagi Departament xabar berdi.

Departamentning Qoraqalpog‘iston Respublikasi boshqarmasi tomonidan o‘tkazilgan tergovga qadar tekshiruvda filialning mas’ul xodimlari tomonidan qabul qilingan va iste’molchilarga yetkazib berilgan tabiiy gaz hajmi o‘rtasidagi tafovut sabablari aniqlanmagani ma’lum bo‘ldi.

Tafovut mas’ul shaxslar tomonidan hisobotlarda “oddiy yo‘qotish” sifatida qayd etilgan. Oqibatda davlat va jamiyat manfaatlariga 251,5 mlrd so‘mlik zarar yetkazilgani aniqlangan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 205-moddasi (hokimiyat yoki mansab vakolatini suiiste’mol qilish) bilan jinoyat ishi qo‘zg‘atildi.

Hozirda holat yuzasidan tergov harakatlari olib borilmoqda.

Ma’lumot uchun, bundan bir necha kun avval Qoraqalpog‘istonda 741 mln so‘mlik suyultirilgan gaz ballonlari talon-toroj qilingani haqida ham xabar berilgan edi. “Kegeyli tuman gaz” ta’minoti bo‘limining moddiy javobgar shaxslari tomonidan 781 dona gaz balloni o‘zlashtirish yo‘li bilan talon-toroj qilingani aniqlangan.