Ashxobod shahrida oʻtayotgan IHT sammiti tadbirlari doirasida Oʻzbekiston Respublikasi Prezidenti Shavkat Mirziyoyev Tojikiston va Pokiston Islom Respublikasi rahbarlari bilan uchrashuv oʻtkazdi. Bu haqda Prezident matbuot xizmati xabar berdi.

Xususan, Shavkat Mirziyoyevning Pokiston Islom Respublikasi Prezidenti Orif Alviy bilan oʻtgan uchrashuvda Oʻzbekiston-Pokiston koʻp qirrali hamkorligini yanada kengaytirish masalalari koʻrib chiqildi.

Sheriklik aloqalari, eng avvalo iqtisodiyot yoʻnalishida jadal rivojlanib borayotgani katta mamnuniyat bilan qayd etildi. Bundan tashqari, mintaqa kun tartibidagi dolzarb masalalar, shu jumladan Afgʻonistonda vujudga kelayotgan vaziyat muhokama qilindi.

Shuningdek, sammit doirasida davlatimiz rahbari Tojikiston Respublikasi Prezidenti Emomali Rahmon bilan ham uchrashuv oʻtkazdi.

Davlat rahbarlari Oʻzbekiston-Tojikiston strategik sheriklik munosabatlarini yanada mustahkamlash masalalarini koʻrib chiqdilar. Keng koʻlamli savdo-iqtisodiy hamkorlikni yanada mustahkamlash muhim ekani qayd etildi.

Sanoat, energetika, qishloq xoʻjaligi, transport, turizm va boshqa ustuvor sohalarda istiqbolli kooperasiya loyihalarini amalga oshirishga alohida eʼtibor qaratildi.

Oʻz navbatida, yetakchilar Markaziy Osiyo mintaqasidagi vaziyatning rivojlanishi yuzasidan ham fikr almashdilar.

• Mirziyoyev
• Prezident
• Turkmaniston