Davlat xavfsizlik xizmati xabariga ko‘ra, Toshkent shahrida Telegram’ messenjeri orqali giyohvandlik moddalarini sotayotgan shaxslar qo‘lga olindi.

Ma’lum qilinishicha, Uchtepada yashovchi 2000-yilda tug‘ilgan fuqaro tomonidan Telegram’ orqali poytaxt hududida sintetik giyohvand moddalar savdosi amalga oshirilayotgani aniqlangan. DXX Toshkent shahar boshqarmasi xodimlari va shahar IIBB hamkorligida o‘tkazilgan tezkor tadbir davomida ushbu shaxs 225 gramm “Alfa-PVP” sintetik narkotik moddasi bilan qo‘lga olingan.

Shuningdek, uning 2005-yilda tug‘ilgan tanishi ham 2 dona “Regapen” kuchli ta’sir qiluvchi dori vositasi bilan ushlangan. Dastlabki so‘rovda ular mazkur dorini Mirzo Ulug‘bek tumanidagi dorixonalardan biridan sotib olganini aytgan. Tezkor tadbir davomida ushbu dorixonaning norasmiy sotuvchisi 14 dona “Regapen” dori vositasini mijozga 1 million 200 ming so‘mga sotayotgan vaqtida qo‘lga olingan.

Bundan tashqari, dorixonaning yordamchi omborxonasidan tegishli hujjatlari bo‘lmagan 20 200 dona “Gabatan”, 823 dona “Regapen”, 100 dona “Galara”, 4 dona “Torgabalin” kabi tarkibida kuchli ta’sir qiluvchi moddalar mavjud bo‘lgan dori vositalari ashyoviy dalil sifatida musodara qilingan.

Hozirda mazkur shaxslarga nisbatan Jinoyat kodeksining tegishli moddalariga asosan jinoyat ishlari qo‘zg‘atilgan va ularga “qamoq” ehtiyot chorasi qo‘llangan. Jinoiy ish yuzasidan tergov harakatlari davom etmoqda.

• Jinoyat
• Uchtepa