Turkiyaning Bursa shahrida nufuzli “Qo‘rqut ota” kinofestivali tantanali ravishda yakunlandi. Unda o‘zbek filmlari birdaniga ikkita asosiy nominatsiya bo‘yicha g‘olib bo‘ldi. “Eng yaxshi badiiy film” nominatsiyasida rejissor Dilmurod Masaidov tomonidan suratga olingan “Ayol qismati” filmi, “Eng yaxshi hujjatli film” nominatsiyasida yosh rejissyor Furqat Usmonovning “Inson” filmi Gran-priga sazovor bo‘ldi. 

Bundan tashqari, o‘zbek aktrisalari Yulduz Radjabova va Ra’no Shodiyeva “Turk xalqining birligi va hamjamiyatiga qo‘shgan hissasi uchun “Turksoy” xalqaro mukofoti bilan taqdirlandi. Ra’no Shodiyeva davolanayotgani bois aktrisa Rayxon Ulasenova mukofotni qabul qilib oldi.

Eslatib o‘tamiz, joriy yil 1-5 noyabr kunlari Bursa shahrida turkiy dunyoning ikkinchi “Qo‘rqut ota” kinofestivali bo‘lib o‘tdi. Festivalda Ozarbayjon, O‘zbekiston, Qirg‘iziston, Qozog‘iston, Turkmaniston kino sanoati vakillari ishtirok etdi. 

“Qo‘rqut ota” kinofestivali doirasida O‘zbekiston kinosi kunlari bo‘lib o‘tdi. O‘zbek kino yulduzlari, aktyor va rejissyorlari bilan ijodiy uchrashuvlar tashkil etilib, Dilmurod Masaidovning “Ayol taqdiri”, Akrom Shaxnazarovning “101 parvoz”, Ibrohim Rasulovning “Muhabbat bahori” hamda Furqat Usmonovning hujjatli filmlari namoyish etildi.

• Festival
• Kino
• Turkiya
• qiziqarli